Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 88 Hüküm no: 93 Orijinal metin no: [38-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Angeli’nin Rus asıllı cariyesini azat etmesi Havâss-ı aliyye kazâsına tâbi‘ Hasköy mahallâtından Pîrî Paşa mahallesinde sâkin Angeli v. Mavro nâm Nasrânî meclis-i şer‘-i hatîr-i lâzımü’t-tevkīrde silk-i mülkünde münselik olan orta boylu açık kaşlı koyun elâ gözlü Rusiyyetü’l-asl Palişka bt. Alemyan nâm câriye-i memlûkem olan mevsûfe-i mezkûru niyet-i hâlisa-i vâfire ve taviyyet-i tayyibe-i sâfiye ile hasbeten lillâhi’l-Hallâk tahrîr ve i‘tâk ve mülkümden izâle ve ihrâc silk-i ahrâr-ı asliyyîne indirâc eyledim. Ba‘de’l-yevm mezbûre Palişka sâir ahrâr-ı asliyyîn gibi hürre olup sâir mevâlî içün şer‘an sâbit olan hakk-ı velâdan gayrı hakkım kalmadı dedikde mukırr-ı merkūmun ikrâr-ı meşrûhunu el-mukarru lehe’l-mezbûre câriye bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fî-evâsıt-ı Cumâdelâhire li-sene selâse ve hamsîn ve elf. Şuhûdü’l-hâl: Mehmed Çelebi b. Ahmed, Pîrî b. Rıdvan, Abdünnebi b. Musa, Muslu b. Veli, Mihail v. Yani, Dimitriyali v. Yani, Zaharya v. Estafo, Yartanoz v. Andon, Yani v. Anderya ve gayruhum mine’l-huzzâr