Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 89 Hüküm no: 94 Orijinal metin no: [38-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Arabkir Sancağı’nda Eğin kasabasındaki bağın satışı Vilâyet-i Anadolu’da vâki‘ Arabkir sancağına tâbi‘ Eğin nâm kasaba sükkânından Haçol v. Yuri ve Agop v. Kirakor nâm Ermeniler meclis-i şer‘-i hatîr-i lâzımü’t-tevkīrde işbu bâ‘isü’l-kitâb Mardiros v. Agop nâm Ermeni mahzarında bi’t-tav‘i’s-sâf ikrâr ve takrîr-i kelâm eyleyip silk-i mülkümüzde münselik olup yine kasaba-i mezbûrede vâki‘ bir tarafdan Haçol v. [Yuri] bağı ve bir tarafdan Fedi v. ( ) bağı ve bir tarafdan Bali v. ( ) bağı ve bir tarafdan müşteri-i merkūm bağı ile mahdûd ve mümtâz olup ale’l-iştirâki’s-seviy mutasarrıf olduğumuz bir kıt‘a mülk bağımızı mezbûr Mardiros’a tâmmü’l-vezn sahîhü’l-ayâr otuz üç aded riyâlî kebîr guruşa bey‘-i bâtt-ı sahîh-i şer‘ile bey‘ edüp semen-i ma‘dûd ve mebî‘-i mezbûru mahâllinde kabza taslît eyledik. Ba‘de’l-yevm sâlifü’z-zikr bir kıt‘a bağ-ı merkūm Mard[ir]us’un mülk-i müşterâsıdır. Keyfe mâ yeşâ ve yahtâr mutasarrıf olsun dediklerinde mukırrân-ı merkūmânın ikrâr-ı meşrûhunu el-mukarru lehu’l-mezbûr Mardiros bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fî-evâsıt-ı Cumâdelâhire li-sene selâse ve hamsîn ve elf. Şuhûd[ü’l-hâl]: Agop v. Dader, Meyri v. Rudi, Serkiz v. Vartek, Serkiz v. Lataf, Canik v. Anberşah, Emircan v. Martan