Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 92 Hüküm no: 100 Orijinal metin no: [40-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gaspar’ın Eğin kasabasındaki olan evini satması Vilâyet-i Anadolu’da vâki‘ Arabkir sancağına tâbi‘ Eğin nâm kasaba sükkânından Kasber v. Bilik nâm Ermeni meclis-i şer‘-i hatîr-i lâzımü’t-tevkīrde işbu râfi‘-i hâze’s-sifr Avanis v. Gazal nâm Ermeni muvâcehesinde bi’t-tav‘i’s-sâf ikrâr ve takrîr-i kelâm edüp silk-i mülkümde münselik olup yine kasaba-i mezbûrede vâki‘ bir tarafdan Agop v. Karagöz mülkü ve bir tarafdan Asvador v. Mirak mülkü ve bir tarafdan Sirah v. Alton mülkü ve bir tarafdan tarîk-ı âm ile mahdûd ve mümtâz olan bir bâb tahtânî mülk menzilimi mezbûr Avanis’e tâmmü’l-vezn sahîhü’l-ayâr altmış yedi kıt‘a riyâlî kebîr guruşa tarafeynden îcâb kabûlü hâvî bey‘-ı bâtt-ı sahîh-i şer‘ ile bey‘ edüp kabz-ı semen-i ma‘dûd ve mebî‘-i mezbûru mahâllinde kabza taslît eyledim. Ol dahî vech-i muharrer üzre iştirâ ve tesellüm ve temellük eyledi. Ba‘de’l-yevm zikrolunan menzil-i mezbûr Avanis’in mülk-i müşterâsıdır. Keyfe mâ yeşâ ve yahtâr mutasarrıf olsun dedikde mukırr-ı merkūmun ikrâr-ı meşrû[hu]nu el-mukarru lehu’l-mezbûr Avanis bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fî-evâhir-i Recebi’l-fer[d] li-sene selâse ve hamsîn ve elf. Şuhûdü’l-hâl: Agop v. Murad, Bogos v. Hayim, Emircan v. Alkaton, Norsuz v. Apras ve gayruhum [41] Sahîh Havâss-ı aliyyeye tâbi‘