Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 91 Hüküm no: 99 Orijinal metin no: [40-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şirugancı esnafının dükkân haricinde şirugan satmamak üzere anlaştıkları Mahmiye-i İstanbul’da şîrugancı tâifesinin hâlen kethudâları olan Mehmed Beşe b. Abdullah ve yiğitbaşıları olan Mahmud b. Abdullah ve tâife-i mezbûreden Hüseyin Bey b. Hasan nâm yesârî ve Musa b. Ali ve Yusuf b. Abdullah ve Sâdık b. Ali ve Mustafa b. Abdullah ve Rıdvan Bey b. Abdullah ve sâirleri meclis-i şer‘-i hatîrde her biri takrîr-i makāl edüp mahmiye-i mezbûra taşradan gelen metâ‘ımız kadîmden kethudâ ve yiğitbaşılarımız izin ve ma‘rifetiyle tevzî‘ ve taksîm olunduğundan mâ‘adâ dükkândan hâricde şîrugan gezip bey‘ etmek memnû‘ iken hâlen aramızdan ba‘z-ı kimesne memnû‘ olmayıp mahallâtda gezip bey‘ u şirâ ederler. Min-ba‘d olageldiği üzre dükkânda taşrada bey‘ etmemekle kavl ve ittifâk eyledik. Vech-i muharrer üzre ittifâkımız savb-ı şer‘-i kavîmden tahrîr olunsun dediklerinde vâki‘ hâl hıfzen li’l-makāl mezbûrûn taleb ve iltimâslarıyla ketb ve sebt olundu. Tahrîren fî-evâhir-i Recebi’l-ferd li-sene selâse ve hamsîn ve elf. Şuhûdü’l-hâl: Osman Beşe b. Abdullah Reis-i Pazar-ı Kapan, Seferî? Bey Bölükbaşı, Ali Çelebi b. Mümin, Ömer Bölükbaşı b. Seydi, Mehmed b. Ahmed