Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 879 Hüküm no: 1148 Orijinal metin no: [139a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Tekâlif vergisi vermemek için haham olanların hahamlıktan azledildikleriyle ilgili ferman gereği bazı hahamların görevden ayrıldıkları Dergâh-ı âlî -dâme mahfûfen bi’l-me‘âlî- çavuşlarından Mustafa Çavuş b. Hüseyin nâm kimesne meclis-i şer‘-i şerîfde tâife-i Yahûd’un Aragon cemâ‘atinden olup hahamları olan Kalaf v. Semuyil ve Antalya cemâ‘atinin hahamları olan Yasef v. Mosi ve Budin ve Karaferye cemâ‘atlerinin hahamları olan İlya v. Avraham ve Sitore ve Ağrıboz cemâ‘atlerinin hahamları olan Mosi v. Nesim ve Kordava cemâ‘atinin hahamları olan Yasef v. Mosi ve Dimetoka cemâ‘atinin hahamları olan Mosi v. İlya ve Niğbolu cemâ‘atlerinin hahamları olan Elyas v. David ve Yeroişreb? cemâ‘atinin hahamları olan Avraham v. İlya nâm Yahudiler muvâcehesinde ikrâr ve takrîr-i kelâm edip Yahudi tâifesinden ba‘zı zî-kudret olanlar mücerred tekâlîf vermemek için biz haham olduk deyû sâir Yahudileri rencîde etmeleri ile hâlâ tâife-i mezbûrenin hahamları olanlar ref‘ ve azl olunup cemâ‘atbaşı olmayalar deyû emr-i şerîf-i cihân-mutâ‘ vârid olmağın mezbûrlardan her biri imtisâlen li’l-emri’l-âlî hahamlıkdan ferâgat edip dürüst hat ta‘bîr olunur hahamlık temessüklerini işbu meclis-i şer‘de bana teslîm ben dahi alıp hark ettiğimden sonra mezbûrlardan her biri ba‘de’l-yevm cemâ‘at üzerine nâzil olan nevâibi sâir Yahudiler ile ma‘an vermeğe ta‘ahhüd eylediler dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâmin aşer min Şevvâli’l-mükerrem li sene seb‘a ve seb‘în ve elf. Şuhûdü’l-hâl: Fahrü’l-akrân Şaban Ağa [b.] Süleyman, fahrü’l-emsâl Eyüb Ağa Kethüdâ-yı hazret-i efendi, mefharü’l-akrân Mehmed Çelebi b. Abdullah Kethüdâ-yı muhzırân, Hasan Beşe b. Abdullah Çukadâr.