Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 878 Hüküm no: 1147 Orijinal metin no: [139a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Girit seferindeki askerlerin ihtiyaçları için ehl-i hireften birer kişinin (orducu) gönderilmesine dair ferman kaydı Akzâ kuzâti’l-müslimîn evlâ vülâti’l-muvahhidîn ma‘denü’l-fazli ve’l-yakīn hüccetü’l-hakkı ale’l-halk ecma‘în vârisü’l-ulûmi’l-enbiyâ ve’l-mürselîn el-muhtassu bi mezîdi inâyeti’l-meliki’l-mu‘în mevlânâ İstanbul kadısı -zîdet fezâiluhû- tevkī‘-i refî‘-i hümâyûn vâsıl olucak ma‘lûm ola ki, işbu sene-i mübâreke düstûr-ı mükerrem müşîr-i müfahham nizâmü’l-âlem nâzım-ı menâzım-ı ümem vezîriâzam ve serdâr-ı ekremim Ahmed Paşa -edâmallâhu te‘âlâ iclâlehû- ve bi’l-cümle kapım kullarım ve sâir asker-i zafer-eserim cümle cezîre-i Girit’de olmağla sefer-i hümâyûnda olan asker-i İslâm için kānûn-ı kadîm üzre ehl-i hıref tâifesinin her birinden Ordu ihrâcı ve acele üzre cezîre-i Girit’e irsâli lâzım gelmeğin imdi sen ki kadısın hâlâ Ordu-yı Hümâyûnu’mdan irsâl olunan Dergâh-ı mu‘allâm çavuşlarının emekdârlarından -kıdvetü’l-emâcid ve’l-a‘yân- Mehmed Çavuş -zîde mecduhû- ma‘rifetiyle nefs-i İstanbul’da olan ekmekçi ve kasab ve bakkal ve pazarcı ve terzi ve berber ve çörekçi ve börekçi ve attâr ve boyacı ve sarrâc ve semerci ve nalbant ve mumcu ve nalçacı ve kazzâz ve bezzâz ve çukacı ve kürkçü ve okçu ve yaycı ve kalaycı ve bakırcı ve paçacı ve aşçı ve bozacı ve sâir ehl-i hıref tâifesinin her birinden kānûn-ı kadîm üzre mükemmel ordu ihrâca kādir ashâbını isimleri ve kefîlleri ile defter edip defteri ile ber vech-i ta‘cîl Girit cezîresine irsâl ve serdâr-ı ekremim ile asker-i İslâm olduğu mahallere mevcûd ve tamâmen teslîm edip zinhâr ihmâl ve müsâhele eylemeyesiz deyû fermânım olmuşdur buyurdum ki, hükm-i şerîfimle mübâşir-i mûmâ-ileyh vardıkda bu bâbda sâdır olan emrim üzre amel edip dahi kat‘an te’hîr ve tevakkuf eylemeyip bin yetmiş ( ) senesine mahsûb olmak üzre nefs-i İstanbul’da olan ehl-i hıref tâifesinin her birinden vech-i meşrûh üzre Girit cezîresinde ve sefer-i hümâyûnda olan asker-i İslâm için ihrâcı fermânım olan mükemmel ordu bu mübâşir-i merkūm -zîde mecduhû- ma‘rifetiyle mu‘accelen ihrâc ve ordu ashâbının isimleri ve kefîlleri ile defter edip ve imzâlayıp defteriyle ber vech-i ta‘cîl tamâmen cezîre-i Girit’e irsâl ve serdâr-ı ekremim ile asker-i İslâm’ın olduğu mahallere mevcûd, tamâmen teslîm edip zinhâr ihmâl ve müsâhele eylemeyesiz el-hâsıl husûs-ı mezbûr asker-i İslâm’ın ziyâde ana göre mukayyed olup sâire kıyâs olunmayıp gelen orducuları cümle levâzımları mükemmel olmak üzre tenbîh ve irsâl ettirdip avk [ve] te’hîrde ve mükemmel ordu olmayıp noksân üzre olmakdan ihtiyât edip vech-i meşrûh üzre olan emrim yerine getiresiz, şöyle bilesiz alâmet-i şerîfe i‘timâd kılasız. Tahrîren fi’l-yevmi’s-sâbi‘ aşer min Şa‘bâni’l-mu‘azzam li sene seb‘a ve seb‘în ve elf. Be-makâm-ı Kal‘a-i Hanya.