Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 117 Hüküm no: 163 Orijinal metin no: [65-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Evleri basılan Ayşe ve Rahime Hatun’un suçsuz bulunduğu Hazret-i Ebî Eyyûb el-Ensârî -aleyhi rahmeti’l-Bârî- muzâfâtından Hasköy mahallâtından el-Hâc Şaban mahallesi mütemekkinelerinden olan Ayşe Hatun bt. Mehmed er-râcil tarafından da‘vâ ve’l-âti’z-zikri beyâna vekîl olup vekâleti Hasan Paşa b. Abdullah ve Mehmed Bey b. Abdullah nâm kimesneler şehâdetleriyle şer‘an sâbite olan Mehmed Paşa b. Hasan er-râcil meclis-i şer‘-i şerîf-i lâzımü’t-tevkīrde Subaşı Sarrâc Hüseyin b. Mehmed nâm kimesneyi ihzâr ve mahzarında takrîr-i da‘vâ edüp müvekkile-i mezbûre Ayşe Hatun kızım ve Rahime bt. Ahmed hatunlar mahalle-i mezbûrda kendi hâllerinde iken mezbûr Subaşı Hüseyin ve yoldaşları Mahmud b. Abdullah ve Ahmed Paşa b. Abdullah ve sâir bilâ-izn-i şer‘î evimiz basıp zulm ve te‘addî etmiştir. Hâlen suâl olunup bi-hasebi’ş-şer‘i’ş-şerîf cevâbı ketb ve tahrîr olunması matlûbumdur dedikde gıbbe’s-suâl mezbûr Hüseyin Subaşı bi’l-muvâcehe hâzırân olup fi’l-vâki‘ mahalle-i mezbûrda vâki‘ menzil-i mezbûrda birkaç nâ-mahrem ricâlden şahıslar var …sıyla? yeniçeri yoldaşlarımızı alıp zikrolunan hâneleri basıp girip içeride nâ-mahrem kimesne bulamadık deyü ikrâr ve i‘tirâf eyledikden sonra ve mezbûre Ayşe’nin ve Rahime hatunların keyfiyet-i hâllerin tefahhus olıcak mahalle-i mezbûre imâmı olan Ahmed Çelebi b. Abdulcebbar ve Ahmed Efendi b. Mehmed Çelebi cemm-i gafîr ve cem‘-i kesîr mezbûretân Ayşe ve Rahime hatunlar iyi hatunlardır. Kendi hâllerindedir. Alâ-tarîkı’ş-şehâde ihbâr-ı sahîh eylediklerinde mâ hüve’l-vâki‘ bi’t-taleb ketb olundu. Tahrîren fî evâhir-i evvel-i Rebî‘ayn sene ihdâ ve selâsîn ve elf. [Şuhûdü’l-hâl:] İbrâhim Efendi b. el-imâm, Edhem Bey b., Mustafa Çelebi el-Cündî, Osman Bey b. ( ) Sahh.