Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 880 Hüküm no: 1150 Orijinal metin no: [139a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Abdullah’tan satın aldığı câriyeyi sağır diye geri vermeye çalışan Mustafa b. Receb’in iddiasının reddi Esirci tâifesinden bâ‘isü’l-kitâb Mehmed b. Abdullah nâm kimesne meclis-i şer‘-i şerîf-i lâzımü’t-teşrîfde Mustafa b. Receb nâm kimesne mahzarında üzerine da‘vâ ve takrîr-i kelâm edip bundan akdem işbu orta boylu, açık kaşlı, koyun elâ gözlü Boğdaniyyetü’l-asl Timurhan bt. Abdullah’ı yedimde mülküm olduğu hâlde mezbûr Mustafa’ya yüz kırk esedî guruşa bey‘ ve teslîm edip mezbûr[u] Mustafa dahi iştirâ ve tesellüm eylediğinden sonra semeninden yüz on esedî guruşunu bana edâ edip bâkī otuz esedî guruşu zimmetinde kalmağın hâlâ semen-i bâkī-i mezbûr Mustafa’dan taleb ettiğimde mevsûfe-i mezbûre sağır değil iken mezbûr Mustafa câriye-i mezbûre sağır imiş deyû semen-i bâkīyi vermekden imtinâ‘ eder suâl olunup alıverilmesi matlûbumdur dedikde, gıbbe’s-suâl mezbûr Mustafa cevâbında mevsûfe-i mezbûreyi müdde‘î-i mezbûreden semen-i mezbûra iştirâ etmişidim ve semeninden otuz guruşu zimmetimde bâkīdir, lâkin mevsûfe-i mezbûre sağır olmağla red murâd eylerim dedikde mevsûfe-i mezbûrenin aslâ sağırlığı olmadığı lede’ş-şer‘i’l-mutahhar sâbit ve mukarrer olmağın mûcebince semen-i mezbûrdan bâkī otuz esedî guruşu müdde‘î-i mezbûra edâya merkūm Mustafa’ya tenbîh olunmağın mâ vaka‘a bi’t-taleb ketb olundu. Fi’l-yevmi’r-râbi‘ min Zilka‘deti’ş-şerîfe li sene seb‘a ve seb‘în ve elf. Şuhûdü’l-hâl: Umdetü’l-eşbâh Abdi Ağa [b.] Abdülmu‘în, umdetü’l-müderrisîn Mehmed Efendi, İbrahim Çelebi b. Ahmed, Hasan Beşe Çukadâr.