Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 880 Hüküm no: 1151 Orijinal metin no: [139b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Donanma kadırgaları için İstanbul’dan avârızhânelere göre kürekçi bedeli tahsiline dair İstanbul kadısına hüküm Akzâ kuzâti’l-müslimîn evlâ vülâti’l-muvahhidîn ma‘denü’l-fazli ve’l-yakīn vârisü’l-enbiyâ ve’l-mürselîn hüccetü’l-hakkı ale’l-halkı ecma‘în el-muhtâssu bi mezîdi inâyeti’l-meliki’l-mu‘în mevlânâ İstanbul kadısı -zîdet fezâiluhû- tevkī‘-i refî‘-i hümâyûn ma‘lûm olucak ma‘lûm ola ki, inşâallâhu te‘âlâ işbu sâl-i ferhunde-fâlda evvel-bahâr-ı huceste-âsârda deryâ yüzüne çıkacak Donanma-yı hümâyûnum kadırgaları için ziyâde kürekçi tedârük ve ihzârı lâzım ve mühim olmağla mahrûse-i İstanbul’da vâki‘ üç bin otuz sekiz buçuk avârız hânelerinin bin yetmiş yedi senesine mahsûb olmak üzre her yedi hânesinden bir nefer kürekçi hesâbı üzre her bir neferine üçer bin akçeden sinîn-i sâbıkada cem‘ olunduğu üzre avârızları mukābelesinde her bir hânesinden dörder yüz yirmi dokuz akçe bedelleri irsâl olunan mühürlü ve nişânlı mevkūfât defteri sûreti mûcebince vakt u zamânıyla cem‘ ve tahsîl ve teslîm-i tersâne ettirilmek fermânım olmuşdur buyurdum ki hükm-i şerîfimle vardıkda ( ) sâdır olan emrim üzre amel edip dahi kazâ-i mezbûrda vâki‘ ol mikdâr avârız hânelerinin târih-i mezbûra mahsûb olmak üzre her hânesinden avârızları mukābelesinde dörder yüz yirmi dokuz akçe hesâbı üzre kürekçi bedelleri irsâl olunan mevkūfât defteri sûreti mûcebince vakt u zamânıyla tahsîl ve teslîm-i tersâne ettirdip ve teslîm olunduğuna Tersâne-i âmire emîninden temessük aldırdıp ol temessükü mevkūfât defterlerine kayd ettirdip kat‘-ı alâka ettiresin ve bundan mâ‘adâ her bir hânesinden Tersâne-i âmirem harcı için on beşer akçe ve cem‘ eden mübâşirin harcı ma‘âşı için onar akçe dahi aldırdıp bundan ziyâde bir akçe alınmaya ve aldırmayasın ve mevkūfât defterine kesr ve noksân getirmeyesiz, cânib-i mîrîye gadr ve zarar olmakdan ve hilâf-ı şer‘ ve kānûn zulm ve te‘addîden ihtirâz eyleyesiz, şöyle bilesiz, alâmet-i şerîfe i‘timâd kılasız. Tahrîren fi’s-sâlis aşer min şehri Cumâdelâhire li sene seb‘a ve seb‘în ve elf. Be-makâm-ı Kal‘a-i Hanya.