Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 118 Hüküm no: 166 Orijinal metin no: [66-3; Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun bt. Hüseyin’in evini Yusuf Ağa’ya sattığı Debbağyunus nâm mahallede sâkine olan Âişe Hatun bt. Hüseyin kıbelinden bey’-i âti’z-zikre vekîl olup vekâleti hasm-ı şer‘î mahzarında Ahmed Halîfe b. Abdi el-imâm ve Mehmed b. Abdülcabbar nâm kimesnelerin şehâdetleri ile sâbite olan Abdi b. Hasan nâm kimesne ikrâr etti ki, müvekkile-i mezbûre işbu akdin sudûruna değin kendisinin mülkünde ve yedinde ve taht-ı tasarrufunda olan Havâss-ı Kostantıniyye el-mahmiye muzâfâtından Hasköy mahallâtından el-Hâc Şa‘bân mahallesinde vâki‘ iki beyt-i ulviyyeyi ve sofa ve iki bi’r-i mâ’ ve kenîfi ve eşcâr-ı müsmire ve gayr-ı müsmiresi olan bahçeyi muhtevî olup bir tarafdan el-Hâc Şa‘bân Vakfı ve bir tarafdan Yahûda v. Avraham nâm Yahûdî mülkü ve bir taraftan Saltana bt. ( ) mülkü ve bir taraftan da tarîk-ı âmm ile mahdûd olan cemî‘-i menzilini bi-cümleti’t-tevâbi‘ ve’l-levâhık ve âmmeti’l-menâfi‘ ve’l-merâfık mikdârı râyic fi’l-vakt yirmi bin fıddî Osmânî akçe semen-i mu‘ayyen-i makbûza işbu bâ‘is-i hâze’l-kitâb fahrü’l-emâsil ve’l-akrân Teberdâr diye bilinen Yusuf Ağa b. ( )’ye iki tarafdan îcâb ve kabûl ile bedelin teslîm ve tesellümünü müştemil bey‘ ve iştirâ-yı bâtteyn-i sahîhayn-i şer‘iyeyn ile bey‘ettikde ol dahi menzil-i mezbûru kendi mâlı ile ve kendi nefsi için ondan satın aldı ve ikrâr-ı sahîh-i şer‘î ile i‘tirâf-ı sarîh-i mer‘î müşteri-i mûmâ ileyh tarafından vicâhen ve şifâhen tasdîk olundu. Cerâ zâlike ve hurrire fi’l-yevmi’s-sâlis min-Rebî‘i’l-âhir li-sene ihdâ ve selâsîn ve elf. Şuhûdü’l-hâl: Fahrü’l-eimme Ahmed b. Abdi, Hüseyin Sûfî b. ( ) el-müezzin, Mehmed b. Abdülcabbar, İbrahim Bey b. ( ) el-Cündî, Ali b. Hüseyin, Hasan b. Uğurlu, Ali b. İshak, Cafer b. Abdullah el-Muhzır