Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 124 Hüküm no: 181 Orijinal metin no: [74-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rahil bt. Murdahay’ın alacaklı olduğu eski eşinden boşandığı Havâss-ı aliyye kazâsına tâbi‘ kasaba-i Hasköy sâkinlerinden Rahil bt. Murdahay? nâm Yahûdiyye meclis-i şer‘-i hatîr-i lâzımü’t-tevkīrde işbu hâmilü’s-sifr Avraham v. Salamon nâm Yahûdî tarafından tasdîk-i câ’i’z-zikre vekîl olup Yaşua ve Benhas ve Sahak v. Avraham şehâdetleri ile şer‘an vekâleti sâbite olan Katorina ve Sahak nâm Yahûdî muvâcehesinde ikrâr-ı tâm ve takrîr-i kelâm edüp müvekkile-i mezbûr Avraham nâm Yahûdî zevcim olup hüsn-i mu‘âşeretimiz olmamağla bundan akdem beni tatlîk etmekle bin kıt‘a riyâlî guruş zimmetinde kalmışdı. El-hâletü-hâzihî zimmetinde mütekarrir bin guruş mehr-i müeccelin üç yüz guruşunu müvekkil-i mezbûr yedinden tamamen ahz u kabz edüp mâ‘adâ yedi yüz guruş da‘vâsından zevcim mezbûr Avraham’ın zimmetini ibrâ-ı âmm-ı kātı‘u’’n-nizâ‘ ile ibrâ ve ıskāt eyledim. Ba‘de’l-yevm mezbûr Avraham ile zevciyete müte‘allik vechen mine’l-vücûhi’ş-şer‘iye da‘vâ ve nizâ‘ım yoktur. Sudûr dahi ederse lede’l-hükkâmi’l-kirâm istimâ‘ olunmaya dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’r-râbi‘ ve’l-işrîn min-Şevvali’l-mükerrem sene isneteyn ve seb‘în ve elf. Şuhûdü’l-hâl: İbrâhim Ağa b. Ali, Dilaver b. Abdullah, Mahmud Çelebi b. Mehmed, Mehmed Çelebi b. Ömer, Mehmed b. Osman, Mehmed Beşe b. Abdullah, İbrâhim el-Muhzır Beyaz.