Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 125 Hüküm no: 182 Orijinal metin no: [75-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İçgüveysi olan Receb’in eşini başka eve taşınmaya zorlamamasının tenbihi Sinîn 1072. Kasaba-i Hasköy’de Turşucuzâde mahallesi sâkinlerinden işbu bâ‘isetü’l-vesîka Fâtıma nâm hatunun babası ve tarafından husûs-ı câi’z-zikr[e] vekîli olup Hudâverdi b. Ahmed ve Mehmed b. Mahmud şehâdetleri ile şer‘an vekâleti sâbite olan Kalaycı İbrâhim Beşe b. Mehmed nâm kimesne meclis-i şer‘-i hatîr-i lâzımü’t-tevkīrde dâmad[ı] Receb b. Abdullah nâm kimesne mahzarında bi’l-vekâle üzerine takrîr-i da‘vâ edüp bundan akdem kızım müvekkile-i merkūmu mahalle-i mezbûrede vâki‘ mülk menzilimde sâkin olmak üzre üç bin akçe mehr-i müeccel ile mezbûr Receb’e akd-i nikâh edüp ol dahi vech-i muharrer üzre müvekkile-i mezbûreyi tezevvüc [ve] kabûl etmişken merkūm Receb müvekkile-i merkūmeyi ihrâc ederim deyü ta‘arruzdan hâlî değildir. Suâl olunup men‘[ve]def‘ olmak murâdımdır dedikde gıbbe’s-suâl merkūm Receb cevâbında müvekkile-i mezbûreyi babasının menzilinde sâkin olmak üzre tezevvüc eylediğini münkir olıcak müdde‘î-i mersûmdan müdde‘âsını mübeyyine beyyine taleb olundukda udûl-i ricâlden olup mahalle-i mezbûre imâmı olan Ali Efendi b. el-Hâc Mehmed ve Ali Çelebi b. İbrâhim ve Ahmed b. Mehmed nâm kimesneler li-ecli[‘ş-]şehâde meclis-i şer‘a hâzırûn olup istişhâd olunduklarında fi’l-vâki‘ müvekkile-i merkūmeyi babası mezbûr Kalaycı İbrâhim Beşe bundan esbak vekâleti ve velâyeti hasebiyle mersûm Receb’e içgüveyisi olmak üzre akd-i nikâh ve tezevvüc eyledikde merkūm Receb dahi üç bin akçe mehr-i müeccel ile içgüveyisi olup merkūm İbrâhim Beşe’nin menzilinde sâkin olmak üzre bizim huzûrumuzda tezevvüc ve kabûl etmişdi. Biz bu husûsa şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde ba‘de’t-ta‘dîli’ş-şer‘î şehâdetleri makbûle olmağın mûcebiyle mezbûr Receb bî-vech ta‘arruzdan men‘ olunup mâ hüve’l-vâki‘ gıbbe’t-taleb ketb olundu. Fi’l-yevmi’s-sâdis aşer min-şehr-i Ramazani’l-mübârek min-şuhûr-i sene isneteyn ve seb‘în ve elf. Şuhûdü’l-hâl: Ramazan Bey b. Abdullah, Dilaver Bey b. Abdullah, Mehmed b. Abdülmennan, İbrâhim b. Dilaver ve gayruhum mine’l-hâzırîn