Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 132 Hüküm no: 194 Orijinal metin no: [85-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İlyazer v. Sahak’ın Nikola’daki alacak davasında sulh bedeli karşılığında anlaşma sağlandığı Havâss-ı aliyye kazâsına tâbi‘ kasaba-i Hasköy’de sâkin Edirne cemâ‘atinden İlyazer v. Sahak nâm Yahûdî tarafından sulh-i câi’z-zikri ikrâra vekîl olup hasm-ı şer‘-î câhid mahzarında Mehmed b. Abdullah ve Menahim v. Kalef şehâdetleri ile şer‘an vekâleti sâbite olan Menahim v. Mihail nâm Yahûdî vekîl meclis-i şer‘-i hatîr-i lâzımü’t-tevkīrde işbu hâmilü’s-sifr Nikola v. Uyoryo nâm zimmî muvâcehesinde bi’l-vekâle ikrâr-ı tâm ve takrîr-i kelâm edip müvekkile-i mesfûr İlyazer’in merkūm Nikola zimmetinde cihet-i deyn-i şer‘îden yüz on sekiz buçuk kıt‘a riyâlî guruş-ı kebîr hakkı olup bundan akdem meblağ-ı mezbûru merkūm Nikola’dan taleb ve da‘vâ eylediğimde vermekde ta‘allül etmekle beynimizde münâza‘ât-ı kesîre ve muhâsamât-ı şedîde cereyân etmiş idi. El-hâletü-hâzihî beynimizde muslihûn tavassut edip meblağ-ı mezbûrdan beni an-ikrâr sekiz bin akçe üzerine inşâ ve akd-i sulh eylediklerinde ben dahi sulh-i mezbûru kabûl ve bedel-i sulh olan meblağ-ı mezbûr sekiz bin akçeyi mersûm Nikola yedinden bi’t-tamam ve’l-kemâl alıp kabz edip meblağ-ı mâ‘adâ da‘vâsından merkūm Nikola’nın vekîl bi’l-mâl olan hazır bi’l-meclis Yani v. Miho ve Yorgi v. Nikola ve Kiryazi v. Lisar nâm zimmîler ibrâ-i âmm-ı kātı‘u’n-nizâ‘ ile ibrâ ve ıskāt eyledim, min-ba‘d merkūmûn zimmîler ile da‘vâ ve nizâ‘ım kalmadı, sudûr dahi ederse lede’l-hükkâmi’l-kirâm istimâ‘ olunmaya dedikde gıbbe’t-tasâdiki’ş-şer‘î mâ-hüve’l-vâki‘ bi’t-taleb ketb olundu. Fi’s-sâlis ve’l-işrîn min-Şevvali’l-mükerrem sene isneteyn ve seb‘în ve elf. Mustafa Ağa b. Sinan, Ali Bey b. Hızır, Mehmed Çavuş b. Ali, es-Seyyid Mehmed Çelebi b. Mustafa, Mehmed Bey b. Ebîbekir, Mahmud Çelebi b. Mehmed, Mehmed Beşe b. Ali, İbrahim b. Dilaver, Yani v. Yorgi ve gayruhum mine’l-hâzırîn