Hasköy Mahkemesi 3 Numaralı Sicil (H. 1023-1081 / M. 1615-1670) cilt: 52, sayfa: 132 Hüküm no: 193 Orijinal metin no: [84-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Çelebi b. Abdullah’ın evini Esteryola bt. Murdahay’a sattığı Havâss-ı aliyye kazâsına tâbi‘ kasaba-i Hasköy’de Kiremitçi Ahmed Çelebi mahallesi sâkinlerinden Ali Çelebi b. Abdullah nâm kimesne meclis-i şer‘-i hatîr-i lâzımü’t-tevkīrde işbu hâmiletü’l-vesîka Esteryola bt. Murdahay nâm Yahûdî muvâcehesinde ikrâr ve i‘tirâf edip silk-i mülkümde münselik olup mahalle-i mezbûrede vâki‘ bir cânibi Mehmed Çavuş b. Abdullah nâm mühtedî ve bir cânibi Tüccâr Mustafa Beşe ve bir cânibi Fâtıma bt. Abdi nâm Hatun mülkleri ve bir cânibi tarîk-i âm ile mahdûd bir bâb tahtânî odayı ve bağçeyi ve müşterek su kuyusunu ve mürûr eyleyecek taş nerdübânı ve kenîfi müştemil olan mülk menzilimi bi-cümleti’t-tevâbi‘ ve’l-levâhık ve kâffetü’l-hukūk ve’l-merâfık Esteryola’ya tarafeynden îcâb ve kabûlü hâvî bey‘-ı sahîh-i şer‘î ile dokuz bin beş yüz nükūd râyic fi’l-vakt akçeye bey‘ ve kabz-ı semen-i mezbûr ve teslîm-i mebî‘-i mahdûd-ı mezkûr eyledim, ba‘de’l-yevm menzil-i mezbûrede vechen mine’l-vücûh benim alâkam kalmadı, merkūm Esteryola’nın mülk-i müşterâsı olmuşdur, keyfe mâ yeşâ’ mutasarrıf olsun dedikde gıbbe’t-tasdîkı’ş-şer‘î mâ-hüve’l-vâki‘ bi’l-ibtigā ketb olundu. Fi’s-sâdis ve’l-işrîn min-Şevvali’l-mükerrem sene isneteyn ve seb‘în ve elf. Şuhûdü’l-hâl: Mehmed Efendi b. Mustafa el-imâm, Abdülbaki Çelebi b. Ahmed el-müezzin, Mustafa Ağa b. ( ) bostânî, Mehmed b. Ahmed, Seyfi Çelebi b. Mehmed, Ramazan Bey b. Abdi, Mustafa Beşe b. Dilaver, Mustafa Bey b. Seyyid Veli, Mehmed Beşe b. Hasan, Mustafa Beşe b. Mehmed tüccâr, Mehmed Çavuş b. İsa, Mehmed Bey b. Mehdi, Mehmed Çelebi b. Ahmed, Mahmud Çelebi b. ( ) el-muhzır ve gayruhum mine’l-hâzırîn