Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 883 Hüküm no: 1155 Orijinal metin no: [140a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Zimmîlerin boyadıkları bogasileri, müslümanların perdaht ettikleri, zimmîlerin bogasi perdaht etmelerinin yasaklandığına dair hüküm kaydı Akzâ kuzâti’l-müslimîn evlâ vülâti’l-muvahhidîn ma‘denü’l-fazli ve’l-yakīn hüccetü’l-hakkı ale’l-halk ecma‘în vârisü’l-ulûmi’l-enbiyâ ve’l-mürselîn el-muhtâssu bi mezîdi inâyeti’l-meliki’l-mu‘în İstanbul ve Galata kadıları -zîdet fezâiluhumâ- tevkī‘-i refî‘-i hümâyûn vâsıl olucak ma‘lûm ola ki, mahrûse-i İstanbul’da ve Galata’da olan boyacı tâifesinden Ustaoğlu Zekeriya nâm kimesne ve sâirleri Dergâh-ı mu‘allâma arzuhâl sunup kadîmden bu âna değin boyacı tezgâhı müslümânlardan olan üstâdların dükkânlarında kurulup boyanan bogasileri müslümânlar perdâht edegelip zimmîlerden olan boyacıların dükkânlarında tezgâh kurulmayıp ve bogasi perdâht olagelmiş değil iken hâlâ zimmî olan boyacılar biz dahi dükkânlarımızda tezgâh kurup bogasi perdâht ederiz deyû dahl ve nizâ‘dan hâlî olmadıkların ve bu bâbda hüccet-i şer‘iyyelerin olduğun bildirip hüccet-i şer‘iyyesi ve kadîmî üzre amel olunmak bâbında hükm-i hümâyûnum ricâ eyledikleri ecilden kadîmden olageldiği üzre amel olunmak bâbında emrim olmuşdur buyurdum ki, [hükm-i] şerîfimle vusûl buldukda bu bâbda sâdır olan emrim üzre amel ve hüccet-i şer‘iyyeye nazar edip göresin, i‘lâm olunduğu üzre kadîmden bu âna değin tezgâh müslimînden olan boyacıların dükkânlarında kurulup ve bogasinin perdâhtı müslümânlara mahsûs iken zimmî tâifesinden olan boyacılar kadîme muhâlif ol vechile dahl ve nizâ‘ eyledikleri mukarrer ise ol bâbda muktezâ-yı şer‘-i kavîm ve mazmûnu muvâfık-ı şer‘ olup alâ vechi’l-hasm sâbit ve zâhir olan hüccet-i şer‘iyye mûcebince ve kadîmîsi üzre âmil olup min ba‘d şer‘-i şerîfe ve hüccet-i şer‘iyyeye ve kadîmden olagelene ve emr-i hümâyûnuma muhâlif kimesneye ta‘allül ve nizâ‘ ettirmeyip men‘ ve def‘ eyleyesin, inâd üzre olup emr-i şerîfime itâ‘at etmeyenleri vukū‘u üzre yazıp arz eyleyip husûs-ı mezbûr için bir emr-i şerîfim dahi varmalı eylemeyesin, şöyle bilesin, alâmet-i şerîfe i‘timâd kılasın. Tahrîren fî evâsıtı şehri Cumâdelûlâ li sene seb‘a ve seb‘în ve elf. Be-makâm-ı medîne-i Yanbolu.