Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 882 Hüküm no: 1154 Orijinal metin no: [140a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Koltukçuların han ve dükkân önlerinde ve kaldırımlarda bogasi satmalarının yasaklandığına dair hüküm kaydı Akzâ kuzâti’l-müslimîn evlâ vülâti’l-muvahhidîn ma‘denü’l-fazli ve’l-yakīn hüccetü’l-hakkı ale’l-halkı ecma‘în vârisü’l-ulûmi’l-enbiyâ’i ve’l-mürselîn el-muhtâssu bi mezîdi inâyeti’l-meliki’l-mu‘în mevlânâ İstanbul kadısı -zîdet fezâiluhû- tevkī‘-i refî‘-i hümâyûn vâsıl olucak ma‘lûm ola ki mahmiye-i İstanbul’da bogasici tâifesi südde-i sa‘âdetime arzuhâl edip âhardan ba‘zı koltukçu tâifesi kadîme muhâlif gelip bunların dükkânları karşısında ve hanlar önünde ve kaldırım taşları üzerinde ve ayak üstünde bogasi ve sâir bunlara mahsûs olan metâ‘ların bey‘ ve şirâ edip bunlara küllî müzâyaka verip te‘addî, bunlar dahi mezbûrları şer‘le men‘ etmek istediklerinde mezbûrlar men‘ olunmadıklarından gayrı şetm-i galîz ile şetm edip te‘addîden hâlî olmadıkların bildirip parmak kapılardan içeri ve han ve dükkânları önünde ve kaldırım taşları ve ayak üzerinde kadîme muhâlif bey‘ etmeyip men‘ ve def‘ olunmak bâbında emr-i şerîfim ricâ eyledikleri ecilden kadîmde olageldiği üzre amel olunmak emrim olmuşdur buyurdum ki, hükm-i şerîfimle vusûl buldukda bu bâbda sâdır olan fermân-ı celîlü’l-kadrim üzre amel edip dahi husûs-ı mezbûra hasmı muvâcehesinde tamâm hak ve adl üzre mukayyed olup göresin i‘lâm olunduğu üzre ise ol vechle fukarâya zulm ve te‘addî olunduğuna kat‘an rızâ-yı şerîfim yokdur, koltukçu tâifesine muhkem tenbîh ve te’kîd eyleyesin ki parmak kapılardan içeri ve han ve dükkânları önünde ve kaldırım taşları üzerinde bey‘ ve şirâ etmeyip men‘ ve def‘ eyleyesin, ba‘de’t-tenbîh eslemeyip vech-i meşrûh üzre geri zulm ve te‘addîden hâlî olmazlarsa vukū‘u üzre yazıp arz eyleyesin, min ba‘d şer‘-i şerîfe ve kadîmden olagelene ve emr-i hümâyûnuma muhâlif kimesneye iş ettirmeyesin şöyle bilesin alâmet-i şerîfe i‘timâd edesin. Tahrîren fî evâsıtı şehri Cumâdelûlâ li sene seb‘a ve seb‘în ve elf. Be-makâm-ı Kostantıniyye el-mahmiyye. Hüccet verilmesin vechen mine’l-vücûh hüccet verilmek câiz değildir. Harrerehu’l-fakīr Mehmed Sadık eş-şehîr bi Ebissuûdzâde.