Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 886 Hüküm no: 1159 Orijinal metin no: [140b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Bostancı Mehmed’in terekesinin beytülmâl emîninden alınıp vârislere verilmesi gerektiği Vilâyet-i Anadolu’da Kastamonu sancağında Küre-i Nühâs kazâsına tâbi‘ Virancık? nâm karye ahâlîsinden Davud b. Mustafa meclis-i şer‘de bi’l-fi‘l bostancılar kethüdâsı olup bilâ-vâris vefât eden bostancıların taraf-ı beytülmâl için terekesini kabza memûr olan umdetü’l-emâcid ve’l-ekârim el-Hâc Ahmed Ağa b. Hüdâverdi tarafından husûs-ı âtîye vekîl-i sâbitü’l-vekâle Zülfikār Bey b. Ali mahzarında da‘vâ edip fi’l-asl karye-i mezbûrede olup hadîka-i hâssa-i sultânîde bostancı iken bundan akdem vefât eden Mehmed’in li ebeveyn karındaşı olup babamız ismi mezbûr Mustafa ve vâlidemiz ismi Tenzile ve maskat-ı re’simiz karye-i mezbûre olup merkūmun verâseti benim ile li ebeveyn kız karındaşımız Elif’e ve vâlidemiz mezbûre Tenzile’ye münhasıra ve mezbûretân Elif ve Tenzile tereke-i müteveffâ-yı mezbûrdan kendilere isâbet eden hisselerini vâzı‘ü’l-yed olanlardan da‘vâ ve taleb ve ahz u kabza ve kendilere îsâle ve ahz ve îsâl mütevakkıf olduğu umûrun küllîsine taraflarından beni vekîl nasb ettiklerinde ben dahi vekâlet-i mezbûreyi kabûl etmeğin müvekkil-i mûmâ-ileyh Ahmed Ağa müteveffâ-yı mezbûrun terekesini bi’l-emâne kabz etmekle makbûzu olan terekeyi mûmâ-ileyh Ahmed Ağa’dan asâleten ve vekâleten taleb ederim, vekîl-i mezbûrdan suâl olunsun dedikde gıbbe’s-suâl vekîl-i mezbûr Zülfikār Bey müvekkil-i mûmâ-ileyhin tereke-i müteveffâ-yı mezbûra bi’l-emâne vaz‘-ı yedini ikrâr, lâkin mezbûrun verâset [ve] vekâletini inkâr edicek müdde‘î-i mezbûrdan müdde‘âsını mübeyyine beyyine taleb olundukda karye-i mezbûre sükkânından İbrahim b. Ali ve Hasan b. Mustafa nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka müdde‘î-i merkūm Davud ile müteveffâ-yı mezbûr Mehmed li ebeveyn karındaşlar olup babaları ismi Mustafa ve anaları ismi Tenzile ve maskat-ı re’sleri karye-i mezbûre olup mezbûrun verâseti müdde‘î-i merkūm Davud ile li ebeveyn kız karındaşı Elif’e ve anaları merkūme Tenzile’ye münhasıra olup bunlardan gayrı vârisi ve terekesine müstahıkk-ı âhar olduğu ma‘lûmumuz değildir mezbûretân Elif ve Tenzile müteveffâ-yı mezbûrun terekesinden kendiye isâbet eden hisselerini tereke-i müteveffâ-yı mezbûra vâzı‘ü’l-yed olanlardan da‘vâ ve taleb ve ahz u kabza ve kendilere îsâle ve ahz u kabz mütevakkıf olduğu umûrun küllîsine müdde‘î-i mezbûr Davud’u taraflarından bizim huzûrumuzda vekîl nasb edip ol dahi kabûl eyledi, biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye ettiklerinde gıbbe ri‘âyeti şerâiti’l-kabûl [şehâdetleri] makbûle olmağın mûcebince merkūmûnun verâsetlerine ve merkūm Davud’un vekâletine hükm olundukdan sonra vekîl-i mezbûr Zülfikār Bey’e müvekkil-i mûmâ-ileyh Ahmed Ağa’nın müteveffâ-yı mezbûrun terekesinden bi’l-emâne makbûzu olan eşyâyı merkūm Davud’a teslîme tenbîh olunup mâ vaka‘a bi’t-taleb ketb olundu. Fi’l-yevmi’s-sânî min Zilka‘de li sene seb‘a ve seb‘în ve elf. Şuhûdü’l-hâl: Receb b. Mustafa, Mustafa b. Hacı, Hasan Çelebi b. Ahmed, İbrahim b. Mehmed.