Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 885 Hüküm no: 1158 Orijinal metin no: [140b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Tekâlif vergilerinden kurtulmak için haham ve cemaatbaşı olanların görevlerinden ayrılmaları ile ilgili hüküm Düstûr-ı mükerrem müşîr-i müfahham nizâmü’l-âlem müdebbir-i umûru’l-cumhûr bi’l-fikri’s-sâkıb mütemmim-i mehâmmi’l-enâm bi’r-re’yi’s-sâib mümehhid-i bünyânü’d-devleti ve’l-ikbâl müşeyyid-i erkânü’s-sa‘âdeti ve’l-iclâl el-mahfûfu bi sunûfi avâtıfi’l-meliki’l-a‘lâ Âsitâne-i sa‘âdetimde sadâret-i uzmâ ve vekâlet-i kübrâ kāimmakāmı olan vezîrim Yusuf Paşa -edâmallâhu te‘âlâ iclâlehû- ve akzâ kuzâti’l-müslimîn evlâ vülâti’l-muvahhidîn ma‘denü’l-fazli ve’l-yakīn hüccetü’l-hakkı ale’l-halk ecma‘în vâris-i ulûmi’l-enbiyâ’i ve’l-mürselîn el-muhtassu bi mezîdi inâyeti’l-meliki’l-mu‘în mevlânâ İstanbul kadısı -zîdet fezâiluhû- tevkī‘-i refî‘-i hümâyûn vâsıl olucak ma‘lûm ola ki, mahmiye-i İstanbul’da sâkin Yahudi tâifesi Dergâh-ı mu‘allâma arzuhâl edip mezbûrların haham ve cemâ‘atbaşıları olup lâkin ihrâk-ı kebîrde cemâ‘atleri perîşân olmağla cümle hahamlar ve cemâ‘atbaşıları ma‘rifetiyle ba‘de’l-yevm mâbeynlerinde haham olmayıp ref‘ olunup herkes kendi teklîfin vermeğe râzılar iken hâlâ ba‘zı zî-kudret Yahudi tâifesi mücerred teklîf vermemek için biz haham olduk deyû mezbûrları rencîde eylediklerin bildirip hâlâ haham olanlar ref‘ olunup ve hahamlıkdan azl olunalar cemâ‘atbaşı olmamak bâbında hükm-i hümâyûnum ricâ eyledikleri ecilden hahamlar ve cemâ‘atbaşıları ittifâkı üzre ba‘de’l-yevm haham olmayıp ve hahamlıkdan azl olunalar, cemâ‘atbaşı olmayıp bu bahâne ile teklîf vermemek için ta‘allül üzre olanları hilâf-ı şer‘ ve kānûn ta‘allül ve inâd ettirilmemek emrim olmuşdur buyurdum ki hükm-i şerîfimle dergâh-ı mu‘allâm çavuşlarından kıdvetü’l-emâsil ve’l-akrân Hüseyin Çavuş -zîde kadruhû- vusûl buldukda bu bâbda sâdır olan fermân-ı celîlü’l-kadrim mûcebince amel edip dahi hahamları ve cemâ‘atbaşıları ittifâkı üzre ba‘de’l-yevm haham olmayıp ve hahamlıkdan azl olunalar, cemâ‘atbaşı olmayıp bu bahâne ile tekâlîf vermemek için ta‘allül üzre olanları hilâf-ı şer‘ ve kānûn inâd ve muhâlefet ettirmeyip tekrâr emrim varmalı eylemeyesiz, şöyle bilesiz, alâmet-i şerîfime i‘timâd kılasız. Tahrîren fî evâili şehri Şevvâli’l-mükerrem li sene seb‘a ve seb‘în ve elf. Be-makâm-ı Edirne el-mahrûse.