Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 61 Hüküm no: 1 Orijinal metin no: [1b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Halil Efendi’nin vakfa olan borcunun vakıf terekesinden tahsili 1081 Bismillahirrahmânirrahîm Efendi hazretleri imzâsıyladır. Mahmiye-i İstanbul’da Dülbendçi Hüsam mahallesi ahâlîsinden iken bundan akdem vefât eden Ahmed Ağa ve Orlu Ahmed Efendi ve ( ) nâm kimesnelerin gallesi mahalle-i mezbûrenin avârızına meşrûta vakıfları olan nukūdun bi’l-fi‘il mütevellîsi olan işbu râfi‘ü’l-kitâb Mehmed Çelebi b. Abdurrahman nâm kimesne meclis-i şer‘-i şerîfde vakf-ı mezbûrun bundan akdem mütevellîsi iken vefât eden Halil Efendi b. İbrahim’in sulbî sagīr oğlu Süleyman ile sulbiye sagīre kızı Hadîce’nin umûrunu ikāmet için taraf-ı şer‘den mansûb vasîler olan Hüseyin Bey b. Mehmed nâm kimesne mahzarında üzerine da‘vâ ve takrîr-i kelâm edip müteveffâ-yı mezbûr Halil Efendi hayâtında asl-ı mâl-ı vakf-ı mezbûrdan yedinde olan yüz seksen esedî guruşu bi-gayr-ı hakkın mesârifine sarf ile istihlâk etmekle zimmetinde deyni olup hattâ müteveffâ-yı mezbûr vech-i muharrer üzere mesârifine sarf ile istihlâk edip zimmetinde deyn olduğunu târîh-i kitâbdan beş ay mukaddem maraz-ı mevtinde ikrâr dahi etmiş idi, suâl olunup tereke-i vâfiyesinden vakıf için bana teslîme vasiyy-i mezbûra tenbîh olunmak matlûbumdur dedikde gıbbe’s-suâl ve’l-inkâr mütevellî-i mezbûrdan müdde‘âsını mübeyyine beyyine taleb olundukda mahalle-i mezbûre sükkânından Mehmed Çelebi b. Rıdvan el-Cündî ve Rıdvan Bey b. Abdullah el-Cündî nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka müteveffâ-yı mezbûr hayâtında asl-ı mâl-ı vakf-ı mezbûrdan yedinde olan yüz seksen guruşu bi-gayr-ı hakkın mesârifine sarf ile istihlâk edip zimmetinde deyn olduğunu târîh-i kitâbdan beş ay mukaddem maraz-ı mevtinde bizim huzûrumuzda ikrâr ve bizi işhâd etmiş idi, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye etdiklerinde ba‘de’t-ta‘dîl ve’t-tezkiye şehâdetleri makbûle olmamağın mûcebince meblağ-ı mezbûr yüz seksen esedî guruşu müteveffâ-yı mezbûrun tereke-i vâfiyesinden vakıf için mütevellî-i mezbûra teslîm ve edâya vasiyy-i mezbûra tenbîh olunmağın mâ-vaka‘a bi’t-taleb ketb olundu. Fî-selhi Cumâdelûlâ li-sene ihdâ ve semânîn ve elf. Şuhûdü’l-hâl: İbrahim Çelebi b. Salih el-imâm, Hasan Çelebi b. Abdullah, el-Hâc Ali b. Ahmed, Ahmed Ağa b. Ömer el-Yesârî, İbrahim Bey b. Musa, Mehmed Efendi b. Hızır