Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 62 Hüküm no: 2 Orijinal metin no: [1b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dülbendçi Hüsam Vakfı’na olan borcunu ödemesi hususunda Papa Haçador’a tenbih olunması Efendi hazretleri imzâsıyladır. Mahmiye-i İstanbul’da merhûm Dülbendçi Hüsam Vakfına bi’l-fi‘il mütevellî olan işbu râfi‘ü’l-kitâb Mehmed Halil b. Abdurrahman nâm kimesne meclis-i şer‘-i şerîfde mahmiye-i mezbûrede Langa kurbünde sâkin Papa Haçador v. Avanos nâm zimmî muvâcehesinde üzerine da‘vâ ve takrîr-i kelâm edip vakf-ı mezbûrun benden mukaddem mütevellîsi iken vefât eden Halil Efendi b. İbrahim nâm kimesne hayâtında asl-ı mâl-ı vakf-ı mezbûrdan yedinde olan üç yüz esedî guruşu mezbûr Haçador’a onu on bir buçukdan hesâbınca ribh vermek üzere idâne ve teslîm, mezbûr Haçador dahi istidâne ve kabz edip hattâ müteveffâ-yı mezbûr târîh-i kitâbdan bir sene mukaddem hayâtında mezbûr Haçador’a idâne ve teslîm etdiği meblağ-ı mezbûr asl-ı mâl-ı vakf-ı mezbûrdan olduğunu ikrâr dahi etmiş idi, suâl olunup vakıf için alıvermek matlûbumdur dedikde gıbbe’s-suâl, mezbûr Haçador cevâbından müteveffâ-yı mezbûrdan hayâtında üç yüz esedî guruş iktirâz ve kabz etmiş idim, lâkin mâl-ı vakf-ı mezbûrdan olduğu ma‘lûmum değildir deyü inkâr edicek, mütevellî-i mezbûrdan müdde‘âsını mübeyyine beyyine taleb olundukda mahmiye-i mezbûrede Dülbendçi Hüsam mahallesi sükkânından Mehmed Çelebi b. Rıdvan el-Cündî ve Rıdvan b. Abdullah el-Cündî nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka müteveffâ-yı mezbûr târîh-i kitâbdan bir sene mukaddem hayâtında mezbûr Haçador’a idâne ve teslîm etdiği üç yüz esedî guruş asl-ı mâl-ı vakf-ı mezbûrdan olduğunu bizim huzûrumuzda ikrâr ve bizi işhâd etmiş idi, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye etdiklerinde ba‘de’t-ta‘dîl ve’t-tezkiye şehâdetleri makbûle olmağın mûcebince meblağ-ı mezbûr üç yüz esedî guruşu vakf-ı mezbûr için mütevellî-i mezbûra teslîm ve edâya merkūm Haçador üzerine hükm-i sahîh-i şer‘î ile hükmolunmağın mâ-vaka‘a bi’t-taleb ketb olundu. Fî-selhi Cumâdelûlâ li-sene ihdâ ve selâsîn ve elf. Şuhûdü’l-hâl: Es-sâbikūn