Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 82 Hüküm no: 30 Orijinal metin no: [6b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şaban Çelebi’nin Rusçuk’un Banavuz köyündeki tarlasını Hüseyin Ağa’ya satması Hüccet, ferâğ-ı tarla Vilâyet-i Rumili’de medîne-i Ruscuk’a tâbi‘ Banavuz nâm karye ahâlîsinden Şa‘bân Çelebi b. Hasan nâm kimesne meclis-i şer‘-i şerîfde sâbıkâ Samsuncubaşı olan umdetü’l-emâcid ve’l-ekârim câmi‘ü’l-mehâsin ve’l-mekârim bâ‘isü hâze’l-kitâb Hüseyin Ağa b. Mahmud ve tarafından ikrâr-ı âti’l-beyânı tasdîka vekîl olup vekâleti Ahmed Beşe b. İbrahim ve Şa‘bân Beşe b. ( ) nâm kimesneler şehâdetleri ile şer‘an sâbite olan Ömer Çelebi b. el-Hâc İbrahim mahzarında ikrâr ve takrîr-i kelâm edip tefvîz-i âti’z-zikrin sudûruna değin taht-ı tasarrufumda olup karye-i mezbûre yanında Musli Köprüsü demekle ma‘rûf köprü kurbünde vâki‘ Ova Tarlası demekle ma‘rûf medîne-i mezbûre keyli ile beş müd tohum istî‘âb eder ma‘lûmü’l-hudûd bir kıt‘a tarlamın hakk-ı tasarrufunu iki yüz yirmi esedî guruş bedel mukābelesinde ma‘rifet-i sâhib-i arz ile müvekkil-i mûmâ-ileyh Hüseyin Ağa’ya ferâğ ve tefvîz, ol dahi tefevvüz ve kabûl edip bedel-i ferâğ olan meblağ-ı mezbûr iki yüz yirmi esedî guruşu müvekkil-i mûmâ-ileyh yedinden tamâmen ahz u kabz etdiğimden sonra mârrü’z-zikr tarlayı mahallinde zabt ve tasarrufa müvekkil-i mûmâ-ileyhi taslît eyledim min-ba‘d hakk-ı müfevvezidir emsâli gibi mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâmin min-Cumâdelâhire li-sene ihdâ ve semânîn ve elf. Şuhûdü’l-hâl: Süleyman Beşe b. Abdullah, Cafer Çelebi b. Abdullah, Mehmed Beşe b. İbrahim, Süleyman Ağa b. Ahmed, İbrahim Çelebi b. Mehmed, Mehmed b. Ramazan, Yusuf Kethüdâ b. ( ).