Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 81 Hüküm no: 29 Orijinal metin no: [6b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rukiye bt. Mehmed’in Uyvar seferinde şehit olan Hüseyin Çorbacı’nın kızı Ayşe’ye borcu olduğunu ikrâr etmesi Hüccet, ikrâr-ı deyn-i müeccel Mahmiye-i İstanbul’da Karabaş mahallesinde sâkine işbu bâ‘isetü’l-vesîka Rukiye bt. Mehmed Efendi nâm hatun meclis-i şer‘-i hatîr-ı lâzımü’t-tevkīrde bundan akdem Uyvar seferinde şehîden vefât eden Hüseyin Çorbacı’nın sulbiye sagīre kızı Âişe’nin tesviye-i umûruna kıbel-i şer‘den mansûb vasîsi olup ve sagīre-i mezbûre Âişe’nin ceddi olan Receb Subaşı b. Mehmed nâm kimesne mahzarında ikrâr ve takrîr-i kelâm edip sagīre-i mezbûre malından zimmetimde yüz kıt‘a esedî guruş deynim olup meblağ-ı mezbûrun elli kıt‘a esedî guruşunu vasiyy-i mezbûr Receb Subaşı’ya meclis-i şer‘de def‘ ve teslîm edip bâkī zimmetimde elli esedî guruş deynim olduğundan mâ‘adâ semeni târîh-i kitâbdan üç yüz altmış gün tamâmına değin müeccel ve mev‘ûdlardan ve zirâ‘ı beynimizde ma‘lûm çuka semeninden dahi yedi buçuk esedî guruş ki cem‘an elli yedi buçuk esedî guruş sagīre-i mezbûre malından zimmetimde vâcibü’l-edâ ve lâzımü’l-kazâ deynimdir dedikde, gıbbe’t-tasdîkı’ş-şer‘î mâ-hüve’l-vaki‘ bi’t-taleb ketb olundu. Fi’l-yevmi’s-sâmin min-Cumâdelâhir li-sene ihdâ ve semânîn ve elf. Şuhûdü’l-hâl: Salih Ağa b. Ali, Hasan Beşe b. Mehmed, Şükrullah Bey b. Mustafa, Hasan Efendi b. Hüsameddin, Keşfî Mustafa Efendi.