Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 83 Hüküm no: 32 Orijinal metin no: [7a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Mustafa Ağa’nın varislerinden Meryem’in diğer varis Yahya aleyhindeki alacak davasından men olunması Mahmiye-i İstanbul’da Seydi Halîfe mahallesinde sâkin iken bundan akdem vefât eden merhûm Mustafa Ağa b. Hasan’ın verâseti zevce-i metrûkeleri Hadîce bt. Abdullah ve Fâtıma bt. İbrahim ve Âişe bt. Ali nâm hatunlar ile sulbî kebîr oğulları Yahya Ağa ve İbrahim Ağa’ya ve sulbiye kebîre kızı Meryem Hatun’a münhasıra ve tashîh-i meselesi yüz yirmi sehmden olup sihâm-ı mezbûreden beşer sehmi mezbûrat Hadîce ve Fâtıma ve Âişe’den her birine ve kırk ikişer sehmi mezbûrân Yahya Ağa ve İbrahim Ağa’dan her birine ve yirmi bir sehmi mezbûre Meryem Hatun’a isâbet etdiği şer‘an sâbit oldukdan sonra mezbûre Meryem Hatun’un zevci ve tarafından husûs-ı ati’l-beyana vekîl olup vekâleti zâtını ma‘rifet-i şer‘iyye ile ârifân mahalle-i mezbûre sükkânından Bayram b. Abdullah ve mahmiye-i mezbûrede Süleymaniye Câmi‘-i şerîfi kurbünde Mollagürânî mahallesinde sâkin Mustafa b. Hasan nâm kimesneler şehâdetleri ile şer‘an sâbite olan Mustafa Çelebi b. Musa nâm kimesne meclis-i şer‘de işbu bâ‘isü’l-kitâb mûmâ-ileyh Yahya Ağa mahzarında bi’l-vekâle üzerine da‘vâ ve takrîr-i kelâm edip müteveffâ-yı mezbûr Mustafa Ağa hayâtında mahmiye-i mezbûre ve Ali Paşa-i atîk mahallesinde vâki‘ lede’l-ahâlî ve’l-cîrân ma‘lûmü’l-hudûd olup Şahhuban Sarayı demekle ma‘rûf binâsı muhterik mülk menzil arsasını ve nıkzını semen-i misli ile bey‘e ve kabz-ı semene ve semen-i mezbûru kendüye îsâle tarafından mûmâ-ileyh Yahya Ağa’yı vekîl edip ol dahi ba‘de kabûli’l-vekâle arsa-i mezbûre ile nıkzının nısfını üç bin kıt‘a esedî guruşa bey‘ edip semenleri olan meblağ-ı mezbûr üç bin kıt‘a esedî guruşu kable’l-ahz mezbûr Mustafa Ağa fevt olup meblağ-ı mezbûr mûmâ-ileyh Yahya Ağa’nın yedinde kalmağla meblağ-ı mezbûr üç bin kıt‘a esedî guruşdan yüz yirmi sehmden müvekkile-i mezbûr Meryem’in hissesi olan beş yüz yirmi beş guruşun mûmâ-ileyh Yahya Ağa’dan suâl olunup alıverilmesi matlûbumdur dedikde gıbbe’s-suâl mezbûr Yahya Ağa cevâbında semen-i mezbûr on bin kıt‘a esedî guruşu bin yetmiş sekiz senesi Zilhiccesi’nin yirminci günü mahmiye-i mezbûrede Davudpaşa Mahkemesi’nde nâibü’ş-şer‘ olan Derviş Efendi b. Emrullah tarafından irsâl olunan Mahmud Efendi’nin mahalle-i mezbûrede müteveffâ-yı mezbûrun hayâtında sâkin olduğu menzilde akd etdiği meclis-i şer‘de müteveffâ-yı mezbûr Mustafa Ağa’ya hayâtında def‘ ü teslîm, ol dahi yedimden ahz u kabz edip hattâ müteveffâ-yı mezbûr Mustafa Ağa meblağ-ı mezbûru yedimden ahz u kabz etdiğini ikrâr ve Mahmud Efendi’ye tahrîr etdirip mezbûr Mahmud Efendi ba‘de’t-tahrîr nâib-i mûmâ-ileyh Derviş Efendi’ye i‘lâm edip hüccet olunmuş idi deyü mazmûnu min-külli’l-vücûh takrîr-i meşrûhunu nâtık ve nâib-i mûmâ-ileyhin hatt ü hâtemini hâviye şehr-i mezbûrun yirminci günü ile müverraha hüccet-i şer‘iyye ibraz edicek gıbbe’l-istintâk ve’l-inkâr mûmâ-ileyh Yahya Ağa husûs-ı mezbûrda emîn olmağla yemîni ile musaddık olup lâkin beyyinesi dahi makbûle olmağla mezbûr Yahya Ağa’dan mazmûn-ı hüccet-i mezbûreye beyyine taleb olundukda udûl-ı ahrâr-ı ricâl-i Müslimînden olup mahalle-i mezbûre sükkânından olan Şeyh Mehmed Efendi b. el-merhûm Şeyh Adil Efendi ve Hasan Çelebi b. el-Merhûm Adil Efendi ve İmâm Salih Efendi b. Ebubekir ve mahmiye-i mezbûrede Kadırga Limanı kurbünde Bostancıbaşı Ali Ağa mahallesi sükkânından İbrahim Ağa b. Memi nâm kimesneler li-ecli’ş-şehâde meclis-i şer‘a hâzırûn olup istişhâd olunduklarında fi’l-hakīka mûmâ-ileyh Yahya Ağa bin yetmiş sekiz senesi Zilhiccesi’nin sekizinci günü semen-i mezbûr üç bin kıt‘a esedî guruşu mezbûr Mahmud Efendi’nin akd etdiği meclis-i mezbûrda müteveffâ-yı mezbûr Mustafa Ağa’ya hâl-i hayâtında ve kemâl-i sıhhatinde bizim huzûrumuzda def‘ ü teslîm edip müteveffâ-yı mezbûr Mustafa Ağa yedinden ahz u kabz etmiş idi. Biz mazmûn-ı hüccet-i mezbûreye bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye etdiklerinde ba‘de’t-ta‘dîl ve’t-tezkiye şehâdetleri makbûle olmağın mûcebince müdde‘î-i mezbûr vech-i muharrer üzere mu‘ârazadan men‘ olunup mâ-vaka‘a bi’t-taleb ketb olundu. Fi’l-yevmi’l-hâmis min-Cumâdelâhire li-sene ihdâ ve semânîn ve elf. Şuhûdü’l-hâl: Şeyh Mehmed Efendi b. eş-Şeyh Adil Efendi, Hasan Çelebi b. el-merhûm Şeyh Adil Efendi, İbrahim Ağa b. Memi, Abdullah Efendi b. Hasan, Veli b. Mahmud, Musa Efendi b. Hüseyin, Mustafa b. Hüseyin, İbrahim Çelebi b. Ahmed, Salih Efendi b. Ebubekir el-imâm.