Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 84 Hüküm no: 33 Orijinal metin no: [7b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fakir durumdaki Hatice Hatun’un oğluna nafaka tahsisi Mahmiye-i İstanbul’da Hadîce Sultan mahallesinde sâkine Hadîce bt. Abdullah nâm hatun meclis-i şer‘-i hatîr-ı lâzımü’t-tevkīrde takrîr-i kelâm edip ben mu‘sıre ve âcize ve kâr [ü] kesbe kādir olmamağla sadrî oğlum Mehmed b. Mustafa nâm kimesne mûsir olmağla cânib-i şer‘-i kavîmden mezbûr Mehmed’in üzerine kadr-ı ma‘rûf nafaka farz ve takdîr olunmak matlûbumdur dedikde, mezbûre Hadîce’nin lede’ş-şer‘ usrü mukarrer olmağın hâkim-i muvakkı‘-ı sadr-ı kitâb tûbâ lehû ve hüsnü-meâb hazretleri dahi mezbûr Mehmed üzerine yevmî altışar akçe farz ve takdîr edip nafaka-i müfrezeyi harc u sarfa ve lede’l-ihtiyâç istidâneye ve vakt-i zaferde mezbûr Mehmed üzerine rücû‘a mezbûre Hadîce’ye izin verilip mâ-vaka‘a bi’t-taleb ketb olundu. Fi’l-yevmi’l-âşir min-Cumâdelâhire li-sene ihdâ ve semânîn ve elf. Şuhûdü’l-hâl: Mehmed Bey b. Abdullah kethüdâ-yı muhzırân, Şükrullah Bey b. Mustafa ser-bölük, Abdi Çelebi b. Hüseyin, Mehmed b. Ramazan, İbrahim Çelebi b. Ahmed.