Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 85 Hüküm no: 34 Orijinal metin no: [7b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Safiye Hatun’un eşi Ebubekir’den muhâlaa yoluyla boşanması Mahmiye-i İstanbul’da Lütfü Paşa kurbünde Defterdâr Ahmed Çelebi mahallesi sâkinelerinden Safiye Hatun bt. Ahmed tarafından husûs-ı âti’l-beyâna vekîl olduğu zâtı ma‘rifet-i şer‘iyye ile ârifân Mehmed Emin Çelebi b. Hasan Efendi ve Hüseyin Çelebi b. Ali ve Himmet Çelebi b. Osman nâm kimesneler şehâdetleri ile şer‘an sâbit olan Receb Efendi b. Mehmed nâm kimesne meclis-i şer‘de müvekkile-i mezbûre Safiye’nin zevc-i dâhilün-bihâsı olan Ebubekir Efendi b. Mustafa nâm kimesne mahzarında bi’l-vekâle ikrâr-ı tâm ve takrîr-i kelâm edip mezbûr Ebubekir Efendi müvekkilem mezbûr Safiye’yi bâyinen tatlîk etmekle zimmetinde mütekarrir ve ma‘kūdün-aleyh olan yedi bin akçe mehr-i müecceli ve cihet-i karzdan mezbûr Ebubekir Efendi zimmetinde hakkı olan yirmi beş şerîfî altın ile bin altı yüz aded maksûs parayı müvekkilem mezbûre Safiye bundan akdem mezbûr Ebubekir Efendi’den da‘vâ etdiğinde mezbûr Ebubekir Efendi mehr-i mezbûrun üzerine benimle muhâla‘a olup meblağ-ı mezbûru bana hîbe etmiş idin deyü da‘vâ etmekle beynlerinde nizâ‘-ı küllî vukū‘undan sonra muslihûn tavassut edip müvekkilem mezbûre ile mezbûr Ebubekir Efendi beynlerinde yirmi kıt‘a esedî guruş üzerine inşâ-i akd-i sulh etdiklerinde müvekkilem mezbûre dahi sulh-ı mezbûru kabûl ve bedel-i sulh olan meblağ-ı mezbûr yirmi kıt‘a esedî guruşu mezbûr Ebubekir Efendi yedinden tamâmen ahz u kabz edip hukūk-ı zevciyete ve târîh-i kitâba gelince beynlerinde cârî olan ahz u i‘tâya müte‘allıka âmme-i da‘vâdan müvekkilem mezbûre, mezbûr Ebubekir Efendi’nin zimmetini ve mezbûr Ebubekir Efendi dahi müvekkile-i mezbûrenin zimmetini ibrâ-i âmm-ı kâtı‘u’n-nizâ‘ ile ibrâ ve iskāt eyledi dedikde gıbbe’t-tasdîkı’ş-şer‘î mâ-vaka‘a [bi’t-taleb ketb olundu]. Fî 12 min-Cumâdelâhire li-sene ihdâ ve semânîn ve elf. Şuhûdü’l-hâl: Mehmed Emin Çelebi b. el-merkūm Hasan Efendi, Mehmed Efendi b. Abdülkerim, Mehmed b. Osman, Abdi Çelebi b. Hüseyin, Mehmed b. Mustafa, Süleyman b. Abdullah, Mustafa Çelebi b. Ahmed, Veli b. Mahmud, Hüseyin b. Ebubekir.