Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 86 Hüküm no: 36 Orijinal metin no: [7b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rukiye Hatun’un Ayşe Hatun ile olan cariye bedeli davasında anlaşma sağlanması Mahmiye-i İstanbul’da Karabaş mahallesi sâkinelerinden fahrü’l-muhadderât Rukiye bt. Mehmed Efendi nâm hatun meclis-i şer‘-i hatîr-ı lâzımü’t-tevkīrde mahmiye-i mezbûrede Karagümrük kurbünde Alipaşa-i atîk mahallesi sâkinelerinden bâ‘isetü hâze’l-kitâb Âişe bt. Mehmed nâm hatunun zevci ve tarafından husûs-ı âti’l-beyâna vekîl olup vekâleti mezbûre Âişe’nin zâtını ma‘rifet-i şer‘iyye ile ârifân İmam Receb Efendi b. Mehmed ve Cafer Halîfe b. İsmail nâm kimesneler şehâdetleri ile şer‘an sâbite olan Mustafa b. Abdurrahman nâm kimesne mahzarında ikrâr ve takrîr-i kelâm edip bundan akdem mezbûre Âişe’ye evsâfı beynimizde ma‘lûm Rusiyyetü’l-asl Gülbuy bt. [8a] Abdullah nâm câriyeyi beş yüz elli esedî guruşa bey‘ ve teslîm, ol dahi iştirâ ve tesellüm etdiğinden sonra semen-i mezbûr beş yüz elli esedî guruşu müvekkile-i mezbûre Âişe’den taleb eylediğimde mezbûr Âişe câriye-i mezbûreyi bana ancak yüz esedî guruşa bey‘ ve teslîm, ben dahi iştirâ ve tesellüm etmiş idim deyüp ziyâdeye iştirâsını inkâr etmekle beynimizde nizâ‘-ı küllî vukū‘undan sonra muslihûn tavassut edip mezbûre Âişe ile beynimizde yüz seksen esedî guruş üzerine inşâ-i akd-i sulh etdiklerinde ben dahi sulh-ı mezbûru kabûl ve bedel-i sulh olan meblağ-ı mezbûru bi’t-defa‘ât yedinden tamâmen ahz u kabz edip husûs-ı mezbûra ve târîh-i kitâba gelince müvekkile-i mezbûre ile beynimizde cârî olan ahz u i‘tâdan beynimizde ma‘lûm bir yüzüğe müte‘allıka da‘vâdan mâ‘adâ âmme-i hukūk-ı ma‘lûme ve mechûle da‘vâsından müvekkile-i mezbûrenin zimmetini ben ve müvekkile-i mezbûre Âişe dahi benim zimmetimi ibrâ-i âm ile ibrâ ve iskāt eyledik dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’s-sâbi‘ min-Cumâdelâhire li-sene ihdâ ve semânîn ve elf. Şuhûdü’l-hâl: Salih Ağa b. Ali, Mumcu Cafer Beşe b. Ali, Receb Beşe b. Mehmed, Ahmed Beşe b. Mustafa, İsmail Bey b. el-Hâc ( ).