Bab Mahkemesi 11 Numaralı Sicil (H. 1081 / M. 1670-1671) cilt: 53, sayfa: 86 Hüküm no: 37 Orijinal metin no: [8a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Yusuf’un Franko’da olan alacağının kefilinden tahsil olunması Efendi hazretleri imzâsıyladır. Havâss-ı refî‘a kazâsı muzâfâtından kasaba-i Çatalca’da Yunus Bey mahallesinde sâkin iken vefât eden el-Hâc Yusuf b. Sinan Bey verâseti zevce-i metrûkesi Saliha bt. Mehmed ve sulbî sagīr oğlu Mustafa ve sulbiye sagīre kızları Nesli ve İsmihan ve Âmine ve Fâtıma ve Âişe’ye münhasıra ve mezbûre Saliha sıgār-ı mezbûrenin kıbel-i şer‘den mansûbe vasîleri olduğu şer‘an sâbit ve mütehakkık oldukdan sonra mezbûre Saliha’nın li-ebeveyn karındaşı olup tarafından vech-i âtî üzere vekâlet iddi‘â eden bâ‘isü hâze’l-kitâb Abdullah Efendi b. Mehmed nâm kimesne meclis-i şer‘-i şerîfde Mehmed Beşe b. Abdullah nâm kimesne mahzarında üzerine da‘vâ ve takrîr-i kelâm edip müteveffâ-yı mezbûrun Sağmancı tâifesinden Franko v. ( ) nâm zimmî zimmetinde koyun bahâsından bâkī hakkı olan on bin akçeyi bundan akdem mezbûr Franko’dan bi’l-vekâle taleb etdiğimde merkūm Mehmed Beşe meblağ-ı mezbûra kefîl olup hattâ vekâleti ikrâr dahi edip mezbûre Saliha meblağ-ı mezbûr on bin akçeyi mezbûr Mehmed Beşe’den ve müteveffâ-yı mezbûrun sâir zimem-i nâsda olan hukūkunu erbâb-ı zimemden taleb ve ahz u kabza ve kendüye îsâle ve kabz [ve] îsâl mütevakkıf olduğu umûrun küllîsine tarafından mukaddemâ beni vekîl ve menâbına nâib nasb u ta‘yîn edip ben dahi vekâlet-i mezbûreyi kabûl etmekle suâl olunup meblağ-ı mezbûrun mezbûr Mehmed Beşe’den vekâletine binâen alıverilmesi matlûbumdur dedikde gıbbe’s-suâl mezbûr Mehmed Beşe cevâbında müteveffâ-yı mezbûrun medyûnu olan merkūm Franko’nun ancak nefsine kefîl olmuş idim deyüp deyn-i mezbûre vekâletini ve müdde‘î-i mezbûrun vekâletini inkâr edicek müdde‘î-i mezbûrdan müdde‘âsını mübeyyin beyyine taleb olundukdan sonra kasaba-i mezbûre ahâlîsinden Mustafa Çelebi b. Hasan Ağa ve el-Hâc Hüseyin b. Hasan nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka mezbûre Saliha meblağ-ı mezbûr on bin akçeyi mezbûr Mehmed Beşe’den ve müteveffâ-yı mezbûrun sâir zimem-i nâsda olan hukūkunu erbâb-ı zimemden taleb ve ahz u kabza ve kendüye îsâl ve kabz [ve] îsâl mütevakkıf olduğu umûrun küllîsine mukaddemâ tarafından kasaba-i mezbûrede müdde‘î-i mezbûru huzûrumuzda vekîl ve menâbına nâib nasb u ta‘yîn edip ol dahi vekâlet-i mezbûreyi kabûl ve merâsimini edâya ta‘ahhüd etmiş idi, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye etdiklerinden sonra mahalle-i mezbûre sükkânından el-Hâc Hüseyin b. Hasan ve mahmiye-i İstanbul’da Yenibahçe kurbünde Alipaşa-i atîk mahallesi sükkânından Kasab Mehmed Beşe b. Yusuf nâm kimesneler li-ecli’ş-şehâdetleri meclis-i şer‘a hâzırân olup istişhâd olunduklarında fi’l-hakīka müteveffâ-yı mezbûrun cihet-i mezbûreden merkūm Franko zimmetinde hakkı olan on bin akçeye mezbûr Mehmed Beşe kefîl olduğu mukaddemâ bizim huzûrumuzda ikrâr ve bizi işhâd etmiş idi, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye etdiklerinde ba‘de’t-ta‘dîl ve’t-tezkiye şuhûd-ı mezbûrenin şehâdetleri makbûle olmağın mûcebince müdde‘î-i mezbûrun vech-i muharrer üzere vekâletine ba‘de’l-hükmi’ş-şer‘î meblağ-ı mezbûr on bin akçeyi vekîl-i mezbûra edâya kefâletine binâen mezbûr Mehmed Beşe’ye tenbîh olunmağla mâ-vaka‘a bi’t-taleb ketb olundu. Fi’l-yevmi’s-sâbi‘ min-Cumâdelâhire li-sene ihdâ ve semânîn ve elf. Şuhûdü’l-hâl: Süleyman Beşe b. Mehmed, Hacı Hüseyin b. Hasan, Mehmed Çelebi b. Abdullah, Halil Halîfe b. ( ), Süleyman b. Ali, Ramazan b. Mehmed.