Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 245 Hüküm no: 315 Orijinal metin no: [178-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Derviş v. Nâdek’in ölümünden dokuz ay önce bağını kızı Tameke’ye hibe ettiği Vilâyet-i Anadolu’da Eğin kazâsına tâbi‘ Çorak nâm karyeden olup hâlen Havâss-ı aliyye kazâsı muzâfâtından Hasköy’de Abdüsselam mahallesinde sâkin iken mürd olan Derviş v. Nâdek nâm zimmînin sadriye kebîre kızı Tameke nâm zimmîyye meclis-i şer‘-i hatîr-i lâzımü’t-tevkīre gelip takrîr-i kelâm edip babam hâlik-i mezbûr Derviş mürd olmazdan dokuz ay mukaddem hâl-i hayâtında iken kazâ-i mezbûra tâbi‘ Venk nâm karye sınırında vâki‘ bir tarafı Cafer b. Abdullah bağı ve bir tarafı Keşiş bağı ve bir tarafı mâ’-ı cârî ve bir tarafı tarîk-i âm ile mahdûd mülk bağını bana hibe-i sahîha-i şer‘iyye ile hibe ve temlîk ve teslîm eylemişdir, hakīkat-i hâle vukūfu olan [179] müslimînden istihbâr olunmak matlûbumdur dedikde, udûl-i müslimînden olup mahalle-i mezbûrede sâkin Süleyman Efendi b. Mirza el-İmâm ve Muzaffer Çavuş b. Abdullah ve Hüseyin b. Yusuf nâm kimesneler alâ tarîki’ş-şehâde meclis-i şer‘a hâzırûn olup fi’l-hakīka hâlik-i mezbûr mürd olmazdan dokuz ay mukaddem zikr olunan bağı bizim huzûrumuzda mezbûre Tameke[‘ye] hibe-i sahîha-i şer‘iyye ile hibe ve temlîk ve teslîm edip ol dahi meclis-i hibede ittihâb ve kabz ve temellük eyledi deyû ihbâr eylediklerinde mâ hüve’l-vâki‘ bi’t-taleb ketb olundu. Tahrîren fi’l-yevmi’s-sânî ve’l-ışrîn min Cumâdelûlâ sene tis‘în ve erba‘în ve elf. Şuhûdü’l-hâl: Mahmud Çelebi b. Mehmed, Mustafa Halîfe b. Surûrî el-İmâm, Mustafa b. Nasuh, Ali b. Abdullah, Gazal v. Papas