Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 246 Hüküm no: 316 Orijinal metin no: [179-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Derviş v. Nâdek’in ölümünden dokuz ay önce ortak olduğu bağdaki hissesini kızı Kenare’ye hibe ettiği Vilâyet-i Anadolu’da Eğin kazâsına tâbi‘ Çorak nâm karyeden olup hâlen Havâss-ı aliyye kazâsı muzâfâtından Hasköy’de Abdüsselam mahallesinde sâkin iken mürd olan Derviş v. Nâdek nâm zimmînin sadriye kebîre kızı Kenare nâm zimmîyye meclis-i şer‘-i hatîr-i lâzımü’t-tevkīre gelip takrîr-i kelâm edip babam hâlik-i mezbûr mürd olmazdan dokuz ay mukaddem hâl-i hayâtında iken mahalle-i mezbûrede vâki‘ bir tarafı Lağımcı Hüseyin mülkü ve bir tarafı ba‘zan Musa Efendi ve ba‘zan Ali Ağa mülkü ve bir tarafı mer‘â ve bir tarafı tarîk-i âm ile mahdûd eşcâr-ı müsmire ve gayr-ı müsmireyi müştemil olan hadîkayı Mıgırdiç nâm zimmî ile ale’l-iştirâki’s-seviy müşterek oldukları mülk hadîkadan nısf hissesini bana hibe-i sahîha-i şer‘iyye ile hibe ve temlîk ve teslîm eylemişdir, hakīkat-i hâle vukūfu olan müslimînden istihbâr olunmak matlûbumdur dedikde, udûl-i müslimînden olup mahalle-i mezbûrede sâkin Süleyman Efendi b. Mirza el-İmâm ve Muzaffer Çavuş b. Abdullah ve Hüseyin b. Yusuf nâm kimesneler alâ tarîki’ş-şehâde meclis-i şer‘a hâzırûn olup fi’l-hakīka hâlik-i mezbûr mürd olmazdan dokuz ay mukaddem zikr olunan hadîkanın nısf hissesini mezbûre Kenare’ye hibe-i sahîha-i şer‘iyye ile hibe ve teslîm ve temlîk edip ol dahi meclis-i hibede hadîka-i mezbûrenin [180] nısfını ittihâb ve kabz ve temellük eyledi deyû ihbâr eylediklerinde mâ hüve’l-vâki‘ bi’t-taleb ketb olundu. Tahrîren fi’l-yevmi’s-sânî ve’l-ışrîn min Cumâdelûlâ li sene tis‘în ve erba‘în ve elf. Şuhûdü’l-hâl: Mahmud Çelebi b. Mehmed es-Serrâc, Mustafa Halîfe b. Surûrî el-İmâm, Mustafa b. Nasuh, Ali b. Abdullah, Gazal v. Papas