Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 248 Hüküm no: 319 Orijinal metin no: [181-183] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Osman Bey b. Mustafa’nın evini vakfettiğine dâir düzenlenen vakfiyesi Elhamdü li veliyyihî ve’s-salâtü ve’s-selâmü alâ Nebiyyihî Muhammedin ve âlihî ve ashâbihî ecma‘în ammâ ba‘d. Havâss-ı aliyye kazâsına tâbi‘ Hasköy mahallâtından Ahmed Çelebi mahallesinde işbu sâhibü’l-hayr ve’l-hasenât sâhibi fahrü’l-akrân Osman Bey b. Mustafa nâm serrâc meclis-i [182] şer‘-i hatîr-i lâzımü’t-tevkīrde vakf-ı âti’l-beyânı li ecli’t-tescîl mütevellî nasb ettiği ( ) nâm kimesne mahzarında bi’t-tav‘i’s-sâf ikrâr ve takrîr-i kelâm eyledi ki silk-i mülkümde muntazam olup mahalle-i mezbûrede vâki‘ iki tarafı Mehmed b. Bilal mülkü ve bir tarafı vâdi ve bir tarafı tarîk-i âm ile mahdûd ve mümtâz olup iki bâb tahtânî odayı ve bir sofayı ve bir bâb dükkânı ve iki bâb fevkānî odayı ve bir sofayı ve bir kenîfi ve bir bi’r-i mâ’ı ve eşcâr-ı müsmire ve gayr-ı müsmireyi müştemil mülk menzilimi cemî‘ tevâbi‘ ve levâhıkı ile hasbeten lillâhi’l-aliyyi’l-azîm ve taleben li merdâti’r-Rabbi’r-rahîm vakf-ı sahîh-i şer‘î ve habs-i sarîh-i mer‘î kılıp şöyle şart eyledim ki, hayâtda oldukça menzil-i merkūmda ben sâkin ve mutasarrıf olup müddet-i hayâtımda vakf-ı mezbûrun tebdîl ve tağyîr ve tevliyet ve sâir tasarrufu yedimde ola, ba‘de’l-vefât evlâd-ı evlâdım batnen ba‘de batnin neslen ba‘de neslin sâkin ve mutasarrıf olalar, ba‘de’l-inkırâz utekāmdan Hüseyin b. Abdullah ve Mülâyim bt. Abdullah ve sâir utekām ale’l-iştirâki’s-seviy sâkin ve mutasarrıf olalar, ba‘de vefâtihim mezbûrların evlâdları sâkin ve mutasarrıf olalar ve sâkin oldukları her gün benim rûhum için üç İhlâs-ı şerîf okuyup sevâbın rûhuma hibe eyleyeler ve menzil-i mezbûru meremmet eyleyeler, merkūmûnun evlâdı bi’l-külliye munkarızûn olursa menzil-i mezbûr Medîne-i Münevvere -şerrefehallâhü te‘âlâ- için i‘dâd olunan evkāfa mülhak vakıf olup mütevellî kim olursa ol kabz ve îcâr eyleyip hâsıl olanı evvelâ taraf-ı pür-şerefe irsâl eyleye ve menzil-i mezbûru li ecli’t-tescîl mütevellî nasb ettiği mezbûr ( ) nâm kimesneye teslîm olup ol dahi meclis-i müşârun-ileyhde tesellüm ve kabzına i‘tirâf ettikden sonra vâkıf-ı mezbûr Osman Bey i‘âde-i kelâm edip vakf-ı akār cümle e’imme-i kibâr ve müctehidîn-i ahyâr katlarında sahîhdir lâkin İmâm-ı A‘zam ve hümâm-ı akdem sirâcü’l-milleti ve’d-dîn Ebû Hanîfe-i Kûfî -âmelehullâhu te‘âlâ bi-lafzı’l-celî ve’l-hafî- katında lâzım olmayıp vâkıf menâfi‘-i vakfı kendiye şart ettikde İmâm Muhammed b. Hasan eş-Şeybânî hazretleri katında bâtıl olmağın vakfından rücû‘ edip kemâl-i silk-i mülküne istirdâd ederin dediğinde, mütevellî-i mezbûr cevâb-ı bâ-savâba tasaddî edip fi’l-hakīka [183] imâm-ı müşârun-ileyh hazretleri katında vakf-ı akār lâzım olmayıp ve vâkıf menâfi‘-i vakfı kendiye şart ettikde İmâm Muhammed katında bâtıldır, ammâ İmâm Ebî Yusuf katında vakf-ı akār sahîh olduğundan sıhhat dahi lüzûmdan mufârık olmayıp ve imâm-ı müşârun-ileyh hazretleri katında vâkıf menâfi‘-i vakfı kendiye şart eyledikde vakıf sahîh [ve] lâzımdır deyû redden imtinâ‘ edip hâkim-i muvakki‘-i sadr-ı kitâb -hedâhüllâhü te‘âlâ sünene’s-savâb-a murâfa‘a olduklarında hâkim-i mûmâ-ileyh -esbağa ni‘amehû aleyh- ba‘de’t-te’emmül cânib-i vakfı evlâ ve ecrâ görüp alâ kavl-i men yerâhü menzil-i mezbûrun vakfiyyetinin sıhhat-i lüzûmuna hüküm ve tescîl edip min ba‘d vakf-ı mezbûrun ibtâl ve ta‘tîli mümteni‘ü’l-ihtimâl oldu -fe-men beddelehû ba‘de mâ semi‘ahû fe-innemâ ismuhû alellezîne yübeddilûnehû innallâhe semî‘un alîm ve ecrü’l-vâkıfı ale’l-hayyi’l-kayyûm.- Hurrire fi’l-yevmi’r-râbi‘ ve’l-ışrîn min Cumâdelûlâ li sene tis‘în ve erba‘în ve elf. Şuhûdü’l-hâl: Ahmed Efendi b. Abdi el-İmâm, Mahmud Çelebi b. Mehmed es-Serrâc, Mustafa Çelebi b. Halil es-Serrâc, Abdi Bey b. Şaban es-Serrâc, Ali Dede b. Hüseyin, Ahmed Bey b. İbrahim, Hüseyin b. Yusuf, Himmet b. Pürkadem, Osman b. Abdullah, Mustafa b. Osman Bey, Mehmed Çelebi b. Mustafa el-İmâm, Mehmed Halîfe b. İbrahim el-Müezzin, Ahmed Çelebi b. Muslu hammâmî, Ahmed Ağa b. Abdülmennân, Mehmed b. Bilal, Rıdvan b. Abdullah, Ebûbekir berber, Hasan b. Pîrî, Mahmud Çelebi b. Mehmed, Ahmed Çelebi b. Mehmed, Mehmed Çelebi b. Ahmed, İbrahim Çelebi b. Ahmed