Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 247 Hüküm no: 318 Orijinal metin no: [180-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Papakirelos adlı keşişin tasarrufunda olan Aynaroz’daki II. Bayezid vakfına ait çayır, bostan ve tarlaları iki keşişe ferâğ ettiği ve hayvanlarını sattığı Mahmiye-i Galata’ya tâbi‘ Mavrimoloz nâm mevzi‘de sâkin Papakirelos v. Mihal nâm keşiş meclis-i şer‘-i hatîr-i lâzımü’t-tevkīrde vilâyet-i Rumeli’nde vâki‘ Mahmiye-i Selânik’e [181] tâbi‘ Aynaroz nâm keşişlikde sâkin Anadyoz v. Andon ve Yanokonoz v. İstefan nâm keşişler muvâcehesinde bi’t-tav‘i’s-sâf ikrâr ve takrîr-i kelâm edip merhûm ve mağfûrun-leh Sultan Bayezid Veli Vakfı’ndan olup beher sene yirmi beş akçe mukāta‘a ile tasarrufumda olup mevzi‘-i merkūmda vâki‘ bir tarafı keşişlik ve bir tarafı deryâ ve bir tarafı kûhistan ve bir tarafı tarîk-i âm ile mahdûd ve mümtâz olup Karaağaç Çayırı demekle ma‘rûf bir kıt‘a çayırın hakk-ı tasarrufunu ve yine mevzi‘-i merkūmda vâki‘ vakf-ı mezbûrdan olup tasarrufumda olan tahmînen üç müd tohum isti‘âb eder tarlaların hakk-ı tasarrufunu ve yine mevzi‘-i merkūmda vâki‘ bir kıt‘a bostan yerinin hakk-ı tasarrufunu vakf-ı mezbûrun mütevellîsi izniyle merkūmân keşişlere ferâğat edip mukābele-i ferâğda merkūmânın yedlerinden üç yüz riyâlî guruş alıp kabz eylediğimden sonra dört re’s sığır öküzümü ve iki re’s bârgirimi ve yüz re’s keçimi mezbûrân keşişlere kâmil yüz yetmiş riyâlî guruşa safka-i vâhide ile bey‘-i bâtt-ı sahîh-i şer‘î ile bey‘ edip kabz-ı semen-i ma‘dûd ve teslîm-i mebî‘-i mahdûd eyledim, ba‘de’l-yevm zikr olunan eşyâ merkūmân keşişlerin mülk-i müşterâsıdır dedikde, mukırr-ı merkūm Papakirelos’un ikrâr-ı meşrûhunu el-mukarru lehü’l-mezbûrân Anadyoz ve Yanokonoz bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fi’l-yevmi’s-sâlis ve’l-ışrîn min Cumâdelûlâ li sene tis‘în ve erba‘în ve elf. Şuhûdü’l-hâl: Mahmud Çelebi b. Mehmed es-Serrâc, Mustafa Çelebi b. Halil es-Serrâc, Ahmed Çelebi b. Muslu, Ali b. Abdullah, Mihal v. Yani, Arestohos v. Dimitri, Bartenyoz v. Andon, Aslan v. Andon, Kaspar v. Baverik, Todori v. Berinhine ve gayruhüm mine’l-hâzırîn