Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 250 Hüküm no: 321 Orijinal metin no: [184-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mahmud Bey b. Mirza’nın evine bakan pencere ihdâsı dolayısıyla dava açtığı komşusu Yako v. Yako ile ilgili şikayetinden vazgeçtiği Havâss-ı aliyye kazâsına tâbi‘ Hasköy mahallâtından Pîrî Paşa mahallesinde sâkin Mahmud Bey b. Mirza nâm cündî meclis-i şer‘-i hatîr-i lâzımü’t-tevkīrde işbu bâ‘isü’l-kitâb Yako v. Yako nâm Yahudi mahzarında bi’t-tav‘i’s-sâf ikrâr ve takrîr-i kelâm edip merkūm Yako mahalle-i mezbûrede Pîrî Paşa İskelesi kurbunda vâki‘ sâkin olduğu menziline beş pencere ihdâs etmekle benim sâkin olduğum menzilime havâle olmağın zikr olunan havâleyi def‘ eyle deyû da‘vâ eylemiş idim el-hâletü hâzihî zikr olunan da‘vâdan mezbûr Yahudinin zimmetini ibrâ-i âm ile ibrâ ve ıskāt-ı tâm ile ıskāt eyledim ba‘de’l-yevm husûs-ı mezbûra müte‘allik benden veyâhud vekîlimden da‘vâ ve nizâ‘ sudûr ve zuhûr ederse lede’l-hükkâmi’l-kirâm mesmû‘a ve makbûle olmaya dedikde mukırr-ı merkūmun ikrâr-ı meşrûhunu el-mukarru lehü’l-mezbûr Yako bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fi’l-yevmi’s-sâbi‘ ve’l-ışrîn min Cumâdelûlâ li sene tis‘în ve erba‘în ve elf. Şuhûdü’l-hâl: Hüseyin b. Pîrî, Mahmud b. Ahmed, Ebûbekir b. Mehmed berber, Hüseyin Çavuş b. Bâli, Ali b. Abdullah