Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 250 Hüküm no: 322 Orijinal metin no: [184-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Halîfe b. Musa’nın evini Osman Çavuş Vakfı’na bey‘ bi’l-istiğlâl yoluyla sattığı Medîne-i Hazret-i Ebâ Eyyûb el-Ensârî -aleyhi rahmetü Rabbihi’l-Bârî- mahallâtından Ali Paşa mahallesinde sâkin Mehmed Halîfe b. Musa nâm kimesne meclis-i şer‘-i hatîr-i lâzımü’t-tevkīrde Osman Çavuş Vakfı’na bi’l-fi‘il mütevellî olan fahrü’l-akrân Mehmed Efendi b. Muharrem nâm kimesne mahzarında bi’t-tav‘i’s-sâf ikrâr ve i‘tirâf edip mahalle-i mezbûrede vâki‘ bir tarafı el-Hâc Ali mülkü [185] ve bir tarafı Cemâleddin Halîfe mülkü ve iki tarafı tarîk-i âm ile mahdûd ve mümtâz olup bir bâb fevkānî odayı ve bir bâb tahtânî odayı ve bir bi’r-i mâ’ı ve eşcâr-ı müsmire ve gayr-ı müsmireyi müştemil olan mülk menzilimi mütevellî-i merkūm Mehmed Efendi’ye otuz iki sikke-i haseneye bey‘ edip ol dahi mâl-ı vakıf ile bi-tarîki’l-istiğlâl iştirâ edip kabz-ı semen ve teslîm-i mebî‘ eylediğimden sonra menzil-i mezbûru ba‘de’t-tahliyeti’ş-şer‘iyye yine târih-i kitâbdan sene-i kâmile gāyetine varınca mütevellî-i mezbûrdan ayda yüz akçeye istîcâr eyledim, ol dahi vech-i meşrûh üzre îcâr ve teslîm eyledi dedikde mütevellî-i merkūm Mehmed Efendi dahi tasdîk ettikden sonra menzil-i mezbûrun derkine ve ücret-i mu‘ayyeneye mahalle-i mezbûrede sâkin mezbûr oğlu Mustafa Çelebi nâm kimesne mezbûr Mehmed Halîfe’nin talebiyle tarafeynden emr-i kabûlü hâviye kefâletle kefîl oldukda mâ hüve’l-vâki‘ bi’t-taleb ketb olundu. Tahrîren fi’l-yevmi’l-âşir min Cumâdelâhire li sene tis‘în ve erba‘în ve elf. Şuhûdü’l-hâl: Ahmed Efendi b. Hüseyin huddâm, Mehmed Halîfe b. Hasan el-Müezzin, Osman Çelebi bevvâb-ı sultânî, el-Hâc Ali b. Abdullah, Mehmed Efendi b. Abuzer, Ali b. Abdullah ve gayruhüm mine’l-hâzırîn