Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 251 Hüküm no: 323 Orijinal metin no: [185-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kiremitçi Budak v. Agop’un yanında çalışan üç kişiye ücret borcuna karşılık bir fırın dolusu kiremit sattığı Havâss-ı aliyye kazâsına tâbi‘ Hasköy mahallâtından Sütlüce mahallesi kurbunda vâki‘ Kağıthâne Deresi demekle ma‘rûf mevzi‘de vâki‘ kiremit fırınında kiremitçi olan Budak v. Agop nâm Ermeni mahfil-i kazâda fırın-ı mezbûrda ücret ile tuğla işleyen Bedros v. Mardik ve karındaşı Pîrî ve Serkis v. Hacik nâm Ermeniler muvâcehesinde ikrâr ve takrîr-i kelâm edip kiremitçiler ıstılâhında bir keyl ıtlâk olunur fırını nâ-puhte kiremit ve tuğla ile doldurmuş idim, el-hâletü hâzihî zikr olunan dolmuş nâ-puhte kiremidimi ve tuğlamı mezbûrûn Ermeniler’e dokuz bin nakd-i râyic fi’l-vakt akçeye bey‘ edip teslîm-i mebî‘ eylediğimden sonra semen olan meblağ-ı mezbûr dokuz bin akçeyi mezbûrûn Ermeniler’in ücret-i mu‘ayyenelerinden zimmetimde olan dokuz bin akçeye takas eyledim dedikde gıbbe’t-tasdîki’l-vicâhî mâ hüve’l-vâki‘ bi’t-taleb ketb olundu. Tahrîren fi’l-yevmi’s-sânî aşer min Cumâdelâhire li sene tis‘în ve erba‘în ve elf. Şuhûdü’l-hâl: Mehmed Çelebi b. Mustafa el-İmâm, Ali b. Abdullah, Mustafa Beşe b. Abdullah, Mustafa Çelebi b. Abdullah er-Râcil, Ferhad v. Şahbaz, Kortos v. Emrik, Hanem v. Aznaver