.:: İstanbul Kadı Sicilleri ::.


Ahi Çelebi Mahkemesi 1 Numaralı Sicil (H. 1063-1064 / M. 1652-1653)
cilt: 49, sayfa: 80
Hüküm no: 53
Orijinal metin no: [8b-6]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Mustafa Beşe’nin evini istiğlâl yoluyla sattığı

Pazarcı tâifesinden Mustafa Beşe b. İlyas nâm kimesne mahfil-i kazâda işbu bâ‘isü’l-kitâb Seyyid Mustafa Çelebi b. Nasuh muvâcehesinde ikrâr ve takrîr-i kelâm edip Yoros kazâsına tâbi‘ Akbaba nâm karyede vâki‘ bir tarafdan Ca‘fer Beşe mülkü ve bir tarafdan Sâliha Hatun mülkü ve tarafeyni tarîk-i âm ile mahdûd bir bâb fevkānî ve bir bâb tahtânî odaları ve eşcâr-ı müsmire ve gayr-ı müsmireyi hâvî hadîkayı müştemil mülk menzilimi on bir bin beş yüz akçe[ye] mezbûr Seyyid Mustafa’ya bey‘ edip ol dahi bi-tarîkı’l-istiğlâl kendi malıyla nefsi’çün iştirâ ve kabûl eyleyip ba‘de’t-tahliyye ve’t-tekābuz menzil-i mezbûru merkūm [9a] Seyyid Mustafa’dan târîh-i kitâbdan bir sene gāyetine değin bin beş yüz akçeye istîcâr ve tesellüm ol dahi îcâr ve tesellüm eyledi dedikde gıbbe’t-tasdîkı’ş-şer‘î meblağ-ı mezbûru ecel-i mezbûr tamamında îfâ eylemeğe mezbûr Seyyid Mustafa vekâlet-i devriye ile vekîlim olup menzil-i mezbûru âhara bey‘ ve temlîk, meblağ-ı mezbûru istîfâ ve ziyâdesin bana def‘ ve teslîm eyle dedikde ol dahi vekâlet-i mezbûreyi kabûl ve hizmet-i lâzımesin edâya müte‘ahhid olmağın mâ-vaka‘a bi’t-taleb ketb olundu.

Fi’r-râbi‘ aşer min-Şa‘bâni’l-mu‘azzam li-sene selâse ve sittin ve elf.

Şuhûdü’l-hâl: Ömer Çavuş b. Beşir, Hüseyin b. Hüseyin, Hasan Çelebi b. Kanber, İbrahim Çelebi b. Davud.