Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 80 Hüküm no: 54 Orijinal metin no: [9a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Avârız olarak toplanmış olup bir kısmı Yasef’te kalmış olan paranın teslimi Mahmiye-i İstanbul’da Yahûd tâifesinden Sabetay v. Robin Luyi mahfil-i şer‘de tâife-i mezbûreden Yasef v. ( ) muvâcehesinde üzerine da‘vâ edip mezbûr Yasef ile mukaddemâ Yahûdilerin Zeytun cemâ‘ati hahamları olup mezbûrların üzerlerine edâsı lâzım olan avârızları için cem‘ olunan elli bin akçeyi guruşa tebdîl edip seksen beş akçe bir guruş hesâbı üzere beş yüz seksen sekiz guruş ile bir rub‘ guruş olup mîrî cânibine teslîm olunmak için mezbûr Yasef’e def‘ ve teslîm edip yedinde kalmış idi. Hâlâ taleb ederim, suâl olunup alıverilmesi matlûbumdur dedikde gıbbe’l-istintak mezbûr Yasef cevâbında fi’l-hakīka mîrî tarafına hurda akçe alınmayıp guruşa tebdîl için elli bin akçe makbûzum olup lâkin yine cemâ‘at başı olan gāib ani’l-meclis Bünyamin v. Mori nâm Yahûdiye iki yüz yirmi guruş ve mezbûr Sabetay’a yüz altmış guruş def‘ ve teslîm edip yedimde ancak iki yüz sekiz guruş bâkī kalmışdır dedikde ikrârı olan iki yüz sekiz guruşu müdde‘î-i mezbûra edâ ve teslîm etmek üzere mezbûr Yasef’e tenbîh olunup mâ-vaka‘a bi’t-taleb ketb olundu. Tahrîren fi’l-yevmi’s-sâbi‘ aşer min-Şa‘bâni’l-mu‘azzam li-sene selâse ve sittin ve elf. Şuhûdü’l-hâl: Seyyid Mehmed Efendi b. Seyyid Ali el-Kādı, Şeyh Mehmed Efendi b. Musa Efendi, Mustafa Efendi b. Mehmed el-Kādı, Mahmud Beşe [b.] Mustafa, Mehmed b. Süleyman Çukadâr, Pîrî Çelebi, Ali Bey b. Mehmed, Rıdvan Beşe b. Abdullah ve gayruhum.