.:: İstanbul Kadı Sicilleri ::.


Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 334
Hüküm no: 460
Orijinal metin no: [254-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Râfiye bt. Abdullah’ın boşandığı Mehmed b. Ramazan’dan mehir ve nafaka alacaklarını tahsil ettiği

Havâss-ı aliyye kazâsına tâbi‘ Hasköy mahallâtından Ahmed Çelebi mahallesinde sâkine Râfiye bt. Abdullah nâm hâtun meclis-i şer‘-i hatîr-i lâzımü’t-tevkīrde işbu bâ‘isü’l-kitâb bundan akdem zevci olan Mehmed b. Ramazan nâm kimesne mahzarında bi’t-tav‘i’s-sâf ikrâr ve takrîr-i kelâm eyleyip mezbûr Mehmed beni tatlîk eyleyip mehr-i müeccelim kâsid akçe zamânında üç bin akçe olup ve iddet nafaka-i mu‘ayyenem zimmetinde bâkī kalmışidi, el-hâletü hâzihî zikr olunan meblağ-ı mezbûr üç bin akçenin altından kıymet-i şer‘iyyesi bin dört yüz kırk akçe edip meblağ-ı mezbûr bin dört yüz kırk akçeyi ve iddet nafaka-i mu‘ayyenemi mezbûr Mehmed yedinden bi’t-tamâm ve’l-kemâl ahz u kabz eyleyip zevciyyete müte‘allik olan cemî‘ de‘âvî ve mutâlebâtdan ve eymândan zimmetini ibrâ-i âm ile ibrâ ve ıskāt-ı tâm ile ıskāt eyledim dedikde, mukırra-i merkūmenin ikrâr-ı meşrûhasını el-mukarru lehü’l-mezbûr Mehmed bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fi’l-yevmi’s-sânî aşer min Rebî‘ilevvel li sene ihdâ ve hamsîn ve elf.


Şuhûdü’l-hâl: Ali Halîfe b. Mehmed, Ali Bey b. Mehmed, Mehmed b. Keyvan, Hasan b. Abdullah, Ali b. Abdullah ve gayruhüm