.:: İstanbul Kadı Sicilleri ::.


Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 339
Hüküm no: 469
Orijinal metin no: [258-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Fâtıma bt. Şaban’ın mülk evini Mehmed b. Rıdvan’a sattığı ve bedelini tahsil ettiği

Havâss-ı aliyye kazâsına tâbi‘ Hasköy mahallâtından el-Hâc Şaban mahallesinde sâkine Fâtıma bt. Şaban nâm hâtun meclis-i şer‘-i hatîr-i lâzımü’t-tevkīrde işbu râfi‘ü’l-kitâb Mehmed b. Rıdvan nâm kimesne mahzarında üzerine ikrâr ve takrîr-i kelâm edip silk-i mülkümde münselik olup mahalle-i mezbûrede vâki‘ bir tarafı Mehmed Bey b. Pürkadem mülkü bir tarafı Âişe bt. Abdullah mülkü ve bir tarafı mezbûre Fâtıma’nın mülkü ve bir tarafı tarîk-i âm ile mahdûd olan bir bâb tahtânî odayı ve bir bâb ahırı ve eşcâr-ı müsmire ve gayr-ı müsmireyi müştemil olan mülk menzilimi mezbûr Mehmed’e nakd-i râyic fi’l-vakt bin üç yüz akçeye bey‘-i bâtt-ı sahîh-i şer‘î ile bey‘ edip kabz-ı semen-i ma‘dûd ve teslîm-i mebî‘-i mahdûd eyledim, ba‘de’l-yevm zikr olunan menzil mezbûr Mehmed’in mülk-i müşterâsıdır keyfemâ yeşâ ve yehtâr mutasarrıf olsun dedikde mukırra-i merkūmenin ikrâr-ı meşrûhasını el-mukarru lehü’l-mezbûr Mehmed bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fî evâsıtı şehri Rebî‘ılâhir sene 1051.


Şuhûdü’l-hâl: ( )