|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 340 Hüküm no: 471 Orijinal metin no: [258-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Meryem bt. Yusuf’un mülk evini Yusuf Bey b. Abdülmennân’a sattığı ve bedelini tahsil ettiği
Havâss-ı aliyye kazâsına tâbi‘ Hasköy mahallâtından Sütlüce’de Mahmu[d] Ağa mahallesinde Meryem bt. Yusuf nâm hâtun meclis-i şer‘-i hatîr-i lâzımü’t-tevkīrde işbu bâ‘isü’l-kitâb fahrü’l-akrân Yusuf Bey b. Abdülmennân nâm kimesne mahzarında bi’t-tav‘i’s-sâf ikrâr ve takrîr-i kelâm edip [259] silk-i mülkümde münselik olup mahalle-i mezbûrede vâki‘ bir tarafı Mehmed Efendi b. İlyas el-Hatîb ve bir tarafı Mehmed Bey b. Şahin ve bir tarafı el-Hâc Mehmed b. Abdullah mülkleri ve bir tarafı Timur b. Yusuf ve ba‘zan tarîk-i âm ile mahdûd ve mümtâz olan bir bâb fevkānî beyti ve altında ahırı ve nısf bi’r-i mâ’ı ve muhavvatayı ve zât-ı eşcâr-ı müsmire ve gayr-ı müsmireyi müştemil olan mülk menzilimi merkūm Yusuf Bey’e tâmmü’l-vezn sahîhü’l-ayâ[r] elli riyâlî guruşa bey‘-i bâtt-ı sahîh-i şer‘î ile bey‘ edip kabz-ı semen-i ma‘dûd ve teslîm-i mebî‘-i mahdûd eyledim ba‘de’l-yevm menzil-i mezbûr merkūm Yusuf Bey’in mülk-i müşterâsıdır keyfemâ yeşâ ve yehtâr mutasarrıf olsun dedikde mukırra-i merkūmenin ikrâr-ı meşrûhasını el-mukarru lehü’l-mezbûr Yusuf Bey bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fî evâsıtı Cumâdelâhire li sene ihdâ ve hamsîn ve elf.
Şuhûdü’l-hâl: Mehmed Efendi b. Mehmed el-Hatîb, Mehmed Efendi b. Hızır el-Müderris, Mehmed Halîfe b. Abdülkerim, Mehmed b. Ömer el-Müezzin, el-Hâc Mehmed b. Abdullah
|