|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 343 Hüküm no: 478 Orijinal metin no: [262-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Mehmed Çelebi b. Osman’ın evini Mihal v. Yani’ye satıp bedelini tahsil ettiği
Havâss-ı aliyye kazâsına tâbi‘ Hasköy mahallâtından Keçeciler mahallesinde sâkin fahrü’l-akrân ebnâ-i sipâhiyândan Mehmed Çelebi b. Osman nâm cündî meclis-i şer‘-i hatîr-i lâzımü’t-tevkīrde işbu bâ‘isü’l-kitâb Mihal v. Yani nâm zimmî mahzarında bi’t-tav‘i’s-sâf ikrâr ve takrîr-i kelâm edip silk-i mülkümde münselik olup mahalle-i mezbûrede vâki‘ bir tarafdan Mehmed Bey b. Abdülmennân mülkü ve bir tarafdan Ganîzâde Efendi bahçesi demekle ma‘rûf olan bahçe ve iki tarafdan tarîk-i âm ve arz-ı hâliye ile mahdûd ve mümtâz olan üç bâb fevkānî odayı ve iki bâb tahtânî odayı ve altında ahırı ve dört bi’r-i mâ’ı ve eşcâr-ı müsmire ve gayr-ı müsmireyi ve hadîkayı müştemil mülk menzilimi cümle tevâbi‘ ve levâhıkı ile mezbûr Mihal’e nakd-i râyicü’l-vakt on yedi bin akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi vech-i meşrûh üzre iştirâ ve kabûl ve kabz ve tesellüm ve temellük eyledikden sonra semen-i mezbûr on yedi bin akçeyi mezbûr Mihal yedinden bi’t-tamâm ve’l-kemâl ahz u kabz eyledim, ba‘de’l-yevm zikr olunan menzil mezbûr Mihal’in mülk-i müşterâsıdır keyfemâ yeşâ ve yehtâr mutasarrıf olsun dedikde mukırr-ı merkūm Mehmed Çelebi’nin minvâl-i muharrer üzre cârî olan ikrâr-ı meşrûhunu el-mukarru lehü’l-mezbûr Mihal bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Hurrire fi’l-yevmi’s-sânî ve’l-ışrîn min Şa‘bâni’l-mu‘azzam li sene ihdâ ve hamsîn ve elf.
Şuhûdü’l-hâl: Mehmed Çelebi b. Mustafa el-İmâm, Mustafa Halîfe b. Hüdâverdi? el-İmâm, Mahmud Çelebi b. Mehmed es-Serrâc, Mustafa Çelebi b. Halil es-Serrâc, Mehmed Halîfe b. İbrahim el-Müezzin, Ahmed Çelebi b. Muslu, Mehmed Bey b. Mustafa serbölük, Ömer Beşe b. Cafer er-Râcil, Hüseyin b. Ali, Yusuf b. Ömer ve gayruhüm mine’l-huzzâr
|