|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 344 Hüküm no: 479 Orijinal metin no: [262-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Ahmed b. Hüseyin’in babasından intikal eden evinin ihtiyaç olmadığı halde vasîsi olan annesi tarafından satıldığı, evin iadesini istediği ve sulh oldukları
Mahmiye-i İstanbul’da vâki‘ Harâccı mahallesinde sâkin sinninin bülûğa tahammülü olan Ahmed b. Hüseyin nâm kimesne meclis-i şer‘de Havâss-ı aliyye kazâsına [tâbi‘] Hasköy mahallâtından Turşucu Hüseyin Çelebi mahallesinde sâkin iken bundan akdem vefât eden Hüseyin Bey b. Mehmed nâm serrâc-ı hâssanın sulbî sagīr oğlu Hasan’ın tesviye-i umûruna vasîyy-i muhtârı olan Muslu b. [263] Veli nâm kimesne mahzarında ikrâr ve takrîr-i kelâm edip sagīr-i mezbûrun babası merhûm-ı merkūm Hüseyin Bey’e târih-i kitâbdan sekiz yıl mukaddem mahalle-i mezbûrede vâki‘ üç tarafı merhûm Turşucu Vakfı ve bir tarafı tarîk-i âm ile mahdûd ve mümtâz olan iki bâb fevkānî ve iki bâb tahtânî büyûtu ve kenîfi ve bir kıt‘a bağı müştemil olup vasîyy-i merkūmun vaz‘-ı yed eylediği menzil babam mezbûr Hüseyin’den irs-i şer‘le bana intikāl edip zarûret-i deyn ve zarûret-i nafaka yoğiken vasiyyem olan vâlidem Âişe bt. Mehmed nâm Hâtun bilâ-vechin sagīr-i mezbûrun babası Hüseyin’e yirmi iki bin akçeye bey‘ eylemiş bilâ-sulh-ı şer‘î bey‘ olmağla menzil-i mezkûr hakkım olmağın alıverilmek matlûbumdur deyû da‘vâ eylediğimde vasîyy-i merkūm Muslu cevâbında fi’l-hakīka menzil-i mezkûru vasîsi olduğum mezbûr Hasan’ın babası Hüseyin hâl-i sıhhatinde babam diğer Hüseyin müteveffânın terekesinden zarûret-i deyn ve nafaka olmağla vasiyyem mezbûre Âişe’den meblağ-ı mezbûra iştirâ ve temellük eylemişdir deyû cevâb verip ben dahi müsevviğ vücûdunu inkâr etmekle beynimizde münaza‘ât-ı kesîre vâkı‘a olmuş idi, el-hâletü hâzihî muslihûn tavassut edip sulh dahi sagīr-i mezbûra enfa‘ olmağın bin beş yüz akçeye sulh e[t]tiklerinde ben dahi sulh-ı mezbûru kabûl ve bedel-i sulh olan meblağ-ı mestûru vasîyy-i merkūm yedinden tamâmen ahz u kabz edip menzil-i merkūma müte‘allik olan de‘âvîden zimmetini ibrâ ve ıskāt eyledim, ba‘de’l-yevm benden veyâhud vekîlimden husûs-ı mezbûra müte‘allik da‘vâ sâdır olursa lede’l-hükkâmi’l-kirâm mesmû‘a ve makbûle olmasın dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Hurrire fi’l-yevmi’s-sâmin ve’l-ışrîn min Şa‘bâni’l-mu‘azzam li sene ihdâ ve hamsîn ve elf.
Şuhûdü’l-hâl: İbrahim Efendi b. Hüsrev el-İmâm, Mahmud Çelebi b. Mehmed es-Serrâc, Abdi b. Şaban es-Serrâc, Ali Dede b. Hüseyin
|