|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 360 Hüküm no: 508 Orijinal metin no: [275-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Evharon v. İsrâyil’in evini Simon v. İsak’a sattığı
Havâss-ı aliyye kazâsı tevâbi‘inden Hasköy nâm karye sâkinlerinden Evharon v. İsrâyil nâm Yahudi meclis-i şer‘-i hatîr-i lâzımü’t-tevkīrde işbu bâ‘isü’l-vesîka Simon v. İsak nâm Yahudi muvâcehesinde bi-tav‘i’s-sâf ikrâr ve i‘tirâf edip karye-i mezbûrede vâki‘ bir tarafı sâhil-i bahr ve bir tarafı Hatice Hâtun bt. Abdullah mülküne ve bir tarafı tarîk-i âm ve [bir] tarafı Mosi v. İsrâyil mülküne müntehî olup üç bâb fevkānî iki bâb tahtânî beytleri ve matbahı ve kenîfi ve bi’r-i mâ’ı ve havluyu müştemil cemî‘ zât-ı eşcâr-ı müsmire ve gayr-ı müsmire ve hadîkayı ve tarîk-i âm tarafından vâki‘ üç bâb dükkânı müştemil cemî‘ menzilimi bi-cümleti[‘t-]tevâbi‘ ve’l-levâhık ile mezbûr Simon v. İsak’a bin iki yüz kıt‘a riyâlî guruş-ı kebîre tarafeynden îcâb ve kabûlü hâvî bey‘-i bâtt-ı sahîh-i şer‘î ile [bey‘] ve teslîm edip ol dahi iştirâ ve tesellüm eyledikden sonra semen-i mezbûr bin iki yüz kıt‘a riyâlî guruşu mezkûr Simon v. İsak yedinden tamâmen ahz u kabz eyledim, min ba‘d menzil-i mezbûrda alâka ve hakkım kalmayıp mezbûr Simon’un mülk-i müşterâsıdır keyfemâ yeşâ ve yehtâr mutasarrıf olsun dedikde mukırr-ı mezbûrun ikrâr-ı meşrûhunu el-mukarru lehü’l-mezbûr vicâhen ve şifâhen tasdîk ve tahkīk edicek mâ hüve’l-vâki‘ bi’t-taleb ketb olundu. Tahrîren fi’l-yevmi’t-tâsi‘ ve’l-ışrîn min Saferi’l-hayr li sene isneyn ve hamsîn ve elf.
Şuhûdü’l-hâl: Mehmed Çelebi b. Mustafa el-bevvâb-ı sultânî, Mahmud Çelebi b. Abdi es-serrâc-ı hâssa, Ali b. Mustafa, Hüseyin b. Ali, Hayem v. Katân, Avraham v. Reyan, Avraham v. Lağol Bu târihde Fenârîzâde diye şöhret bulan medîne-i Havâss-ı Kostantıniyye kadısı Mehmed Efendi tarafından el-fakīr ilallâhi’l-ganiyyi’l-kadîr yeniden makâma oturdu. Hasköy hilâfetine nâib olan el-fakīr Mehmed tarafından tahrîr olundu. Sene isneyn ve hamsîn ve elf. (Mühür)
|