|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 361 Hüküm no: 510 Orijinal metin no: [276-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Yusuf b. Abdülmennân’ın karısı Âişe bt. Habîb’i vekîli vasıtasıyla bâyin talâkla boşadığı
Mahmiye-i Galata hâricinde kasaba-i Kasımpaşa mahallâtından Kara Hoca mahallesinde sâkin gāib ani’l-meclis olan Yusuf b. Abdülmennân nâm kimesne tarafından husûs-ı âti’l-beyânı tatlîka vekîl olup vekâleti Hasköy’de peremeci tâ’ifesinden Halil b. Şükrullah ve Mustafa b. Hüseyin nâm kimesneler şehâdetleri ile sâbite olan Ebûbekir b. Ali nâm kimesne meclis-i şer‘-i hatîr-i lâzımü’t-tevkīrde işbu bâ‘isetü’l-kitâb müvekkili mezbûr Yusuf’un zevcesi olan Âişe bt. Habîb nâm hâtun mahzarında bi’l-vekâle ikrâr ve takrîr-i kelâm edip mezbûre Âişe’yi vekâlet-i mahkiyyem hasebiyle talâk-ı bâyin ile tatlîk eyledim dedikde, vekîl-i merkūm Ebûbekir’in minvâl-i muharrer üzre sâdır olan ikrâr-ı meşrûhunu el-mukarru leha’l-mezbûre Âişe bi’l-muvâcehe tasdîk ve bi’l-müşâfehe tahkīk edecek mâ hüve’l-vâki‘ bi’t-taleb ketb olundu. [Tahrîren] fi’l-yevmi’l-hâmis min şehri Rebî‘ilevvel li sene isneyn ve hamsîn ve elf.
Şuhûdü’l-hâl: Kâmil Efendi b. Ali, Ali Dede b. Hüseyin, Ahmed Bey b. İbrahim, el-Hâc Mehmed b. Kadri, Es-Seydi Çelebi b. es-Seyyid İbrahim, İbrahim b. Halil
|