.:: İstanbul Kadı Sicilleri ::.


Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 361
Hüküm no: 511
Orijinal metin no: [276-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Mustafa b. Mehmed’in Oruç b. Seydi’yi odunla darp ettiği iddiasıyla oğlu tarafından açılan dava neticesinde sulh oldukları

Havâss-ı aliyye kazâsına tâbi‘ Hasköy mahallâtından Keçeciler mahallesinde sâkin Oruc b. Seydi nâm kimesne tarafından husûs-ı âti’l-beyâna vekîl olup vekâleti karye-i mezbûre sükkânından Ali Dede b. Hüseyin ve Ahmed Çelebi b. Mustafa nâm kimesneler şehâdetleri ile sâbite olan sulbî kebîr oğlu Hüseyin nâm kimesne mahfil-i kazâda işbu râfi‘ü’l-kitâb Mustafa b. Mehmed nâm [kimesne] mahzarında bi’l-vekâle ikrâr ve takrîr-i kelâm edip mezbûr Mustafa târih-i kitâbdan bir gün mukaddem Hasköy İskelesi demekle ma‘rûf mevzi‘de babam merkūm Oruc’u bi-gayr-ı vech-i şer‘î karnının sol tarafından odun ile darb edip ol darbdan sâhib-i firâş oldu deyû da‘vâ ve taleb edip ol dahi inkâr ile cevâb verip isbât etmek sadedinde iken beynimizde muslihûn tavassut edip ber-fehvâ-yı hadîs-i şerîf-i Seyyidü’l-enâm “es-sulhu seyyidü’l-ahkâm” husûs-ı mezbûru melhem-bahâ on bir kıt‘a riyâlî guruşa sulh edip bedel-i sulh olan on bir kıt‘a riyâlî guruşu yedinden alıp kabz edip vekâletim hasebiyle zimmetini husûs-ı mezbûra müte‘allik cemî‘ de‘âvî ve husûmât ve erş-i cinâyetten ibrâ-i âm ile ibrâ ve ıskāt-ı tâm ile ıskāt eyledim dedikde vekîl-i merkūmun ikrâr-ı meşrûhu mezbûr Mustafa talebiyle ketb olundu. Tahrîren fi’l-yevmi’t-tâsi‘ min şehri Rebî‘ilevvel li sene isneyn ve hamsîn ve elf.


Şuhûdü’l-hâl: Mustafa Usta b. Ali Hadîka-i sultânî, Mehmed Çelebi b. Mehmed es-Serrâc, İsmail Çavuş el-Mübâşir, Ali diğer b. Mustafa serbölük