|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 366 Hüküm no: 519 Orijinal metin no: [280-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Vergilerini ödemeyen meyhâne kiracılarının ikâz ve tenbih edilmeleri
Havâss-ı aliyye muzâfâtından Pîrî Paşa nâm karyede vâki‘ olan meyhânelere mülkiyet üzre mutasarrıf olanlardan işbu hâmil-i hâze’l-kitâb Angel v. Mavridi ve Dimitri v. Mesa ve Eslor v. ( ) ve sâirleri meclis-i şer‘-i şerîf-i lâzımü’t-teşrîfde müste’cirleri olanlardan Yorgi ve Yanaki ve Mercan v. Sehar ve katırcı Mikayil v. Behar ve Arzhan v. Arslan ve Cano v. Doltiye ve Manol v. Mihal ve Alekse v. Toma nâm meyhânecileri ihzâr mahzarlarında takrîr-i kelâm ve ta‘bîr ani’l-merâm edip müste’cirûn-ı mezbûrûn hîn-i istîcârlarında eğer tekâlîf-i mîrîye ve eğer sâir tekâlîfden lâzım gelen husûsun cümlesine ta‘ahhüd ve her birinin taht-ı icâresinde olup meyhânede hizmetkâr olanın nefsine tekeffül etmişler iken hâlen cânib-i mîrîye ve sâir husûsa müte‘allik olan tekâlîfden imtinâ‘ları sebebiyle her biri ta‘cîz ve tazyîkden hâlî değillerdir suâl olunup kıbel-i şer‘-i şerîfden ta‘ahhüdleri üzre tenbîh olunmaların taleb ederiz dediklerinde gıbbe’s-suâl müste’cirûn-ı mezbûrûn cevâblarında fi’l-vâki‘ minvâl-i muharrer üzre husûs-ı mezbûre ta‘ahhüd ve hizmetkârlarımızın nefislerine tekeffül etmişizdir dediklerinde ta‘ahhüdleri üzre tenbîh bir[le] mâ vaka‘a bi’t-taleb ketb olundu. [Tahrîren] fi’l-yevmi’s-sâmin min şehri Rebî‘ılâhir li sene isneyn ve hamsîn ve elf.
Şuhûdü’l-hâl: Mustafa Ağa zâbit-i Hasköy hâlen, Dilâver b. Abdullah el-Muhtesib, Yahya b. İbrahim el-Muhtesib, Ali el-muhzır ve gayruhüm
|