|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 370 Hüküm no: 526 Orijinal metin no: [283-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Behek v. Feroğzar’ın Eğin’deki evini Artin v. Enco’ya sattığı
Vilâyet-i Anadolu’da Arapgir sancağında kasaba-i Eğin mahallâtından Mîrhayr mahallesi sâkinlerinden Behek v. Firuğzar nâm zimmî mahfil-i kazâda işbu râfi‘ü’l-vesîka Artin v. Enco nâm zimmî mahzarında ikrâr ve i‘tirâf edip mahalle-i mezbûrede vâki‘ bir tarafı Hanım mülkü ile ve bir tarafı Bekir mülkü ile ve bir tarafı [284] yine mezbûr Behek mülkü ile ve bir tarafı tarîk-i âm [ile] mahdûd olup bir bâb tahtânî odayı ve bir sofayı ve tûlen ve arzan ma‘lûmü’l-kadr arsa-i hâliyeyi muhtevî olan mülk menzilimi bi-cümleti’t-tevâbi‘ ve’l-levâhık mezbûr Artin’e yetmiş beş kıt‘a riyâlî kebîr guruşa tarafeynden îcâb ve kabûlü hâvî bey‘-i bâtt-ı kat‘î ile bey‘ edip kabz-ı semen ve teslîm-i müsemmen eyledim ba‘de’l-yevm menzil-i mezbûr merkūm Artin’in mülk-i müşterâsıdır keyfemâ yeşâ ve yehtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Hurrire fi’l-yevmi’r-râbi‘ ve’l-ışrîn min Rebî‘ılâhir li sene isneyn ve hamsîn ve elf.
Şuhûdü’l-hâl: Ali el-muhzır, Kaspar v. Pelek, Kiryakoz v. Azad, Cânem v. Ladif, Moseş v. Hobyar, Murad v. Kalender, Merak v. Evrik, Behzad v. Feroğzar ve gayruhüm
|