.:: İstanbul Kadı Sicilleri ::.


Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 369
Hüküm no: 525
Orijinal metin no: [283-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Ahmed Ağa b. Abdülmennân’ın evini oğlu Mehmed Çelebi’ye hibe ettiği

Havâss-ı aliyye kazâsı tevâbi‘inden Hasköy mahallâtından Kiremitçi Ahmed Çelebi mahallesi sâkinlerinden fahrü’l-akrân Ahmed Ağa b. Abdülmennân mahfil-i kazâda ve mahfil-i irtizâda işbu râfi‘ü’l-vesîka sulbî kebîr oğlu Mehmed Çelebi mahzarında ikrâr ve takrîr-i kelâm edip silk ve mülkümde muntazam olan emlâkimden mahalle-i mezbûrede vâki‘ bir tarafı hâlen Haremeyn-i Muhteremeyn müfettişi olan umdetü’l-müderrisîni’l-kirâm Ahmed Efendi mülkü ile ve iki tarafı Mehmed Çelebi mülkü ile ve bir tarafı tarîk-i âm ile mahdûd olup iki fevkānî odaları ve bir köşkü ve bir sofayı ve bir tahta-pûşu ve bir tahtânî odayı ve bir matbahı ve bi’r-i mâ’ı ve bir şirugan kurusu değirmeni ile ve iki kenîfi muhtevî olan menzilimi oğlum mezbûr Mehmed’e hibe-i sahîha-i şer‘iyye ile hibe ve temlîk ve teslîm edip ol dahi meclis-i hibede ba‘de’t-tahliyeti’ş-şer‘iyye menzil-i mezbûru ittihâb ve kabz ve kabûl eyledi, ba‘de’l-yevm mülk-i mevhûbesi olup keyfemâ yeşâ ve yehtâr mutasarrıf olsun dedikde mukırr-ı mezbûr Ahmed Ağa’nın vech-i muharrer üzre cârî olan ikrârını el-mukarru lehü’l-mezbûr Mehmed Çelebi bi’l-muvâcehe tahkīk ve bi’l-müşâfehe tasdîk edicek mâ vaka‘a bi’t-taleb ketb olundu. Hurrire fi’l-yevmi’s-sâlis ve’l-ışrîn min şehri Rebî‘ılâhir li sene isneyn ve hamsîn ve elf.


Şuhûdü’l-hâl: Mehmed Efendi b. Mustafa el-İmâm, Ahmed Efendi b. Abdi el-İmâm, Mehmed Halîfe [b.] İbrahim el-Müezzin, Abdülbâkī Halîfe b. Ahmed el-Müezzin, Mahmud Çelebi b. Mehmed serrâc-ı hâssa, Ahmed Çelebi b. Mustafa el-Hammâmî, Mahmu[d] Çelebi b. Mehmed Ağa, Ahmed Çelebi b. Mehmed Ağa, Ali Beşe b. Ahmed, Mehmed b. Aslan, Yahya Bey b. İbrahim el-Muhtesib, Ali el-muhzır ve gayruhüm mine’l-huzzâr