.:: İstanbul Kadı Sicilleri ::.


Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 371
Hüküm no: 528
Orijinal metin no: [284-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Hasan Dede b. Mehmed’in tasarrufundaki vakıf arsayı Receb b. İbrahim’e devrettiği

Havâss-ı aliyye tevâbi‘inden Hasköy’de vâki‘ el-Hâc Şaban mahallesi sâkinlerinden Hasan Dede b. eş-Şeyh Mehmed meclis-i şer‘-i şerîfde işbu râfi‘ü’l-vesîka Receb b. İbrahim mahzarında ikrâr ve i‘tirâf edip mahalle-i mezbûrede vâki‘ bir tarafı Mehmed nâm kimesne mülkü ile ve bir tarafı İlya nâm Yahudi mülkü ile ve tarafeyni tarîk-i âm ile mahdûd binâsı mülküm ve arsası merhûm ve mağfiret-nişân Sultan Bayezid Hân -aleyhi’r-rahmetü ve’r-rıdvân- hazretlerinin câmi‘-i şerîfleri evkāfından olup vakf-ı mezbûra beher sene on iki akçe mukāta‘ası olan menzilimin arsa-i hâliyesinden tûlen on sekiz zirâ‘ ve arzan yedi zirâ‘ cem‘an yirmi beş zirâ‘ arsa-i hâliyeyi beher sene cânib-i vakf-ı mezbûra üçer akçe mukāta‘a vermek üzre mezbûr [285] Receb’e hakk-ı tasarrufun tefvîz edip mukābele-i tefvîzde üç bin nakd-i râyic fi’l-vakt akçesini yedinden bi’t-tamâm ahz u kabz eyledim ba‘de’l-yevm arsa-i mezbûre merkūm Receb’in taht-ı yedinde ve kabza-i tasarrufunda olup keyfemâ yeşâ ve yehtâr mutasarrıf olsun dedikde gıbbe’t-tasdîki’l-mu‘teber mâ vaka‘a bi’t-taleb ketb olundu. Hurrire fi’l-yevmi’s-sâlis min şehri Cumâdelûlâ li sene isneteyn ve hamsîn ve elf.


Şuhûdü’l-hâl: Ahmed Efendi el-İmâm, Hüseyin Halîfe el-Müezzin, Muslu Beşe, Mehmed Beşe, Ahmed b. Mehmed, Ahmed b. Ali, Mustafa Çelebi b. Abdullah, Hüseyin Bey b. Mustafa, Mahmud Çelebi, Mehmed Çelebi b. Ahmed, Ali b. Abdullah ve gayruhüm mine’l-hâzırîn