.:: İstanbul Kadı Sicilleri ::.


Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 374
Hüküm no: 532
Orijinal metin no: [287-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Harâbe olan vakıf Yahudihânenin mutasarrıfı Simon v. Mayer tarafından kiraya mahsûben tamiri için keşfi

Havâss-ı aliyye tevâbi‘inden kasaba-i Hasköy’de vâki‘ merhûm Muslu Efendi Evkāfı’ndan olup bir tarafı Yahuda v. Petrore mülkü ile ve bir tarafı Mosal v. Yohar mülkü ile ve bir tarafı Senyore cemâ‘ati mülkü ile ve bir tarafı tarîk-i âm ile mahdûd olan on üç bâb oda Yahudihâneye icâre-i mu‘accele ve müeccele ile mutasarrıf olan Simon v. Mayer nâm Yahudi meclis-i şer‘de vakf-ı mezbûra bi’l-fi‘il meşrûtiyyet üzre mütevellî olan umdetü kuzâti’l-İslâm zübdetü vülâti’l-enâm Ahmed Efendi mahzarında takrîr-i kelâm edip zikr olunan on üç bâb oda Yahudihânenin sekiz bâb odası bi’l-külliye harâba müşrif olup kābil-i süknâ olmamağın kendi mâlım ile icâre-i mu‘accelesine mahsûb olmak üzre müceddeden binâ etmek murâd ederim, kıbel-i şer‘-i şerîfden üzerine varılıp sâbıku’z-zikr sekiz bâb odanın nakzı keşf ve tahmîn olunmasın taleb ederim dedikde savb-ı şer‘-i şerîfden bu fakīr ve hâssa mi‘mârlarından üstâd ve zeyl-i kitâbda isimleri mastûr olan müslimîn ile üzerine varılıp keşf ve mu‘âyene olundukda sâlifü’z-zikr sekiz bâb odanın dolma duvarları tûlen ve arzan bi-hesâb-ı şatrancî bennâ zirâ‘ıyla dört yüz altmış iki buçuk zirâ‘ olup her zirâ‘ı on beşer akçeden elli bin dokuz yüz kırk yedi akçeye ve yine tûlen ve arzan bi-hesâb-ı mezbûr dört yüz elli sekiz zirâ‘ sakf her zirâ‘ı yirmi beşer akçeden on bir bin dör[t] yüz elli akçeye ve yine tûlen ve arzan bi-hesâb-ı mezbûr yüz on dör[t] zirâ‘ taş duvar her zirâ‘ı otuzar akçeden üç bin dört yüz yirmi akçeye ve yine tûlen ve arzan bi-hesâb-ı mezbûr yüz elli sekiz buçuk zirâ‘ tahta döşeme her zirâ‘ı on beşer akçeden iki bin üç yüz yetmiş yedi akçe ve on aded demir pencere her biri yüz ellişer akçeden bin beş yüz akçeye ve on sekiz aded İznikmid direği her biri otuzar akçeden bin beş yüz kırk akçeye ve yüz hâki taş yedi yüz akçeye ve dört kürsü taşı seksen akçeye cem‘an yirmi yedi bin dört akçeye tahmîn-i sahîh ile tahmîn olunduğu mahallinde tahrîr olunup mâ vaka‘a kayd şüd. Hurrire fi’l-yevmi’r-râbi‘ aşer min şehri Cumâdelûlâ li sene isneyn ve hamsîn ve elf.


Şuhûdü’l-hâl: Ahmed Efendi b. Abdullah el-İmâm, Mehmed Efendi b. Mustafa el-İmâm, Ahmed Ağa b. ( ), Abdülbâkī Halîfe b. Ahmed el-Müezzin, Mehmed Halîfe b. İbrahim el-Müezzin, Hasan Halîfe b. Uğurlu el-Müezzin, Ali Dede b. Hüseyin, Sofu Hüseyin el-Müezzin, Musa en-neccâr, Kurd Beşe en-neccâr, Abdurrahim Çelebi er-Râcil, Ali b. Abdullah el-muhzır