.:: İstanbul Kadı Sicilleri ::.


Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 373
Hüküm no: 531
Orijinal metin no: [286-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Yasef ve Avraham’ın Belkıs bt. Mustafa’dan kiraladıkları Yahudihâne odasının tamirine harcadıklarının tespiti için yapılan keşif

Mahmiye-i Kostantıniyye mahallâtından Meydancık mahallesi sâkinlerinden Yahudi tâ’ifesinden Kalivre cemâ‘atinden işbu râfi‘ayü’l-vesîka Yasef v. Salamon ve Avraham v. Yako nâm Yahudiler meclis-i şer‘de sevk-i kelâm eylediler ki yine mahmiye-i mezbûre mahallâtından Langa kurbunda Kâtib Kasım mahallesi sâkinelerinden Belkıs bt. Mustafa nâm hâtunun Havâss-ı aliyye kazâsına tâbi‘ Hasköy’de vâki‘ sâhil-i bahr olan mülk Yahudihânesinden bir bâb harâba müşrif fevkānî odayı kendi mâlımız ile ta‘mîr etmek üzre yevmî ikişer akçe icâre-i müeccele ile istîcâra istîzân eylediğimizde mezbûre Belkıs nâm hâtun dahi izin vermeğin biz dahi ma‘rifet-i şer‘î ile ta‘mîr edip cem‘an iki yüz riyâlî kebîr guruş harc u sarf eyledik, savb-ı şer‘den üzerine varılıp keşf ve tahrîr ve tahmîn ve meremmete tahammülü ta‘yîn olunmasın taleb eder[iz] dediklerinde, kıbel-i şer‘-i şerîfden bu fakīr ve hâssa mi‘mârlarından Üstâd el-Hâc Hasan ve zeyl-i kitâbda esâmisi mastûr olan müslimîn ile üzerine varılıp keşf ve müşâhede ettiklerinde fi’l-hakīka sâlifü’z-zikr Yahudihânenin bir bâb fevkānî odasının tûlen on buçuk zirâ‘ ve arzan altı zirâ‘ bi-hesâb-ı şatrancî altmış zirâ‘ tahta döşemesiyle ve mezbûr odanın üç tarafı iki kat nîm şişeli perdesiyle ve dokuz aded cedîd penceresiyle ve üç aded cedîd dolabıyla ve nısfından ziyâde cedîd tavanıyla ve iki tarafı cedîd sakfıyla ve bir fevkānî cedîd matbah fırınıyla ve bir fevkānî cedîd kenîfiyle ve dehliziyle ve ba‘zı meremmetiyle cem‘an iki yüz riyâlî kebîr guruşa ancak ta‘mîr ve meremmet olunur, meblağ-ı mezbûr iki yüz riyâlî kebîr guruşdan noksan ile ta‘mîr ve meremmet müyesser değildir deyû mi‘mâr-ı mezbûr ve sâir ehl-i vukūf kimesneler haber vermeğin mâ vaka‘a kayd şüd. Hurrire fi’t-târihi’l-mezbûr. Şuhûd[ü’l-hâl]: es-Sâbıkūn